浪漫 • 有乜好講 精選

浪漫是洋人用字，好多時都用喺同愛情有關嘅表達。浪漫呢樣嘢，你又會怕老土但又暗暗地期待。

根據Cambridge Dictionary : 浪漫嘅英文Romantic 嘅解釋有三:
1)Relating to love or to an affectionate, loving relationship;
2)If something is romantic, it is exciting and mysterious and has a strong effect on your emotions;
3)Romantic ideas and people are not practical or related to real life.

三個解釋中，以第三個最寫實: 浪漫嘅嘢都係脱離現實。或者，我試下將浪漫用量化嘅方式表達出嚟。浪漫嘢嘅價值往往都係同現實需要嘅最低價值不乎。點？好似明又好似唔明？再貼地啲，我哋用錢量化呢個討論緊嘅價值。舉個例，而家好多人都鍾意玩求婚。其實求婚可以好簡單，好似二個人行下行下突然講: 「我哋结婚囉。」咁就完咗嫁喇。戒指都唔駛，消費最低價值可以係$0。對啲自命係浪漫Maker嘅人嚟講，咁樣一啲都唔浪漫。想浪漫？一定要玩大佢！請隊crew大街大巷做場大龍鳳，拍哂片，影snap shot，要pink 有pink, 要balloons 有 balloons, 要童話故事有童話故事，總之有咁激搞咁激。浪漫過後盛惠五位數字埋單。浪漫係可以用錢堆砌出嚟。而且，一山還有一山，好似喺度鬥咁，花臣層出不窮，壓力越嚟越大。你睇下，分分鐘搞到有求婚恐惧症tim。總結，花費多過最低現實消費，咁就實夠浪漫啦。
唔係喎，「同現實需要嘅最低價值不乎」可以係洗大咗都可以係洗少咗嫁。無錯，行行下街隨手摘條草織隻戒指用嚟求婚都可以係浪漫，而且用嘅係人哋嘅資源，換句話說不但唔使錢仲可以算係負數，即係低過$0。由此可見，浪漫嘅價值唔一定係貴，都可以係平。咁即係錢唔係浪漫嘅重點，錢只係浪漫嘅要點。因為好多嘢都要一點點錢就可以。所以唔好再講: 「鬼唔想浪漫咩，有錢至得㗎！」咁就真係好唔浪漫嘞。
「現實需要嘅最低價值」其實即係現實一樣咁平凡，再講白啲就係「行」(粤語第三音); 即係行貨個行。呢個行指嘅係平時平日都係咁做嘅做法，無新意，悶。比如年年生日都係食飯呀，切蛋糕呀，唱K呀，送禮物呀咁，悶！ 又或者拍拖出街總係行街呀，睇戲呀，食飯呀，唱K呀，上你度呀，上我度呀咁，你睇，又有唱K嘞，幾無新意。咁係咪有新意就係浪漫呢？可以係可以唔係。比如今次出去拍拖搞啲新意思，同女朋友一齊做運動，就打羽毛球啦。玩就幾好玩，不過就唔多覺得浪漫咗囉。如果玩雙人瑜珈呢？咦？好似成件事即時浪漫咗好多咁喎。可能打羽毛球嘅交流主要係球技嘅交流，比較剛性。 你諗吓隔住個網，個羽毛球又飛嚟飛去，你又俾個波帶著咁仆前撲後救波，需要極高嘅專注力同埋體力，绝對目標清楚，硬到不得了，肯定無得分心咁又邊有空間享受浪漫呢。雙人瑜珈就完全唔同嘞，呢樣嘢主要係透過身體運動令身心平衡，做到心靈修行。雙人就更加著重溝通啦，身體接觸仲多好多Tim, 呢啲算係軟性交流。由此可見，提升浪漫指數，可以喺提高彼此嘅心靈感受，軟性交流方面著手。所以，凡事都唔可以做咗當做到。心思比新意重要。喂！ 大佬！ 你攞啲乜嘢雙人瑜珈咁鬼高尚嘅嘢嚟講，我點差識啫。嗱！正話講咗嫁嘞，浪漫無分貴賤。轉個悠閒行山運動，遊山玩水夠貼地亦可以好浪漫。
曾經有人講過: 「…. 唔係大聲就係好戲嫁……」，係要用心，好似三级片嘅女星都要隆胸取悦觀眾一樣。唔好拉咁遠，講個近啲嘅，今屆我最喜愛女歌手。佢係有用心「演譯」佢要唱嘅歌，喺隻歌嘅好多位置佢都有用心擺啲嘢或者拎走啲嘢令你想聽佢今次會點唱呢，有期待同時有担心，搞到好似自己有份演譯 咁。呢種類型嘅感染力，我睇唔到有幾多個有幸擁有。聽佢唱歌是一種好正嘅浪漫。可能因為佢有一個very romantic, very romantic，miss u much嘅k型老公同埋家庭啦。

男人嘅浪漫: 豆腐火腩飯。係成熟男人嘅喜愛。因為生理嘅藍圖，𡃁仔好多時鍾意甜嘢瘦野，包括女仔。但越來越成熟，愛好慢慢轉為鍾意食咸啲，有味道啲，肥啲啲都無所謂嘅嘢。豆腐火腩飯就中晒又飽肚。當男人好肚餓嗰陣，一碟豆腐火腩飯就應咗佢最真實嘅需要，唔使扮有taste ，扮有型，回歸麻甩佬嘅雛形。一次又一次咁堅守呢碟飯嘅呢份認真，就係男人對真實嘅堅持，呢種認真男人嘅堅持，好似好無謂，好無聊。但正正係無無謂謂，無無聊聊嘅堅持，就已經好浪漫啦。