閲讀理解 · 理解閲讀 （二）功夫套路 精選

閱讀理解「無壓閱讀」係幫你唔好唔知乜頭乜路就俾人嚇嚫，連分都唔識攞甚至係唔敢攞就走咗去。呢個「無壓閱讀」手法，可以令人踏出第一步。唔好睇小呢一步，有個鬼佬喺嫦娥嗰度行咗一小步，佢自己就話係人類嘅一大步。又好多人都會話: 第一步係最困難嘅，行出第一步就係踏入成功嘅開始。呢句嘢真堅真到你唔信，容易到不得了。你試過你就知。不過可唔可以成功就要睇你自己每次遇到嚇嚫你嘅嘢嘅時候，你會唔會記得要再踏出第一步。第一步其實係心理包袱大於真實困難。要記住，呢一步係幫你唔係阻你。有人講過: 「唔好怯呀，怯就輸成世嫁嘞！」
唔想再俾人嚇窒，就要認識驚乜，有乜好驚，好多時自己嚇自己，multiple effect 自己搞掂咗自己。

今時今日嘅閱讀理解真係無解嘅。問題問嘅嘢可能連作者本身都無諗過，可能佢自己都唔會全部識答晒。佢甚至死咗都會彈返起身，乜我真係寫咗呢啲咁嘅嘢咩！乜原來我寫啲嘢係咁嘅咩？我寫嘅時候應該無咁仔细咁考慮過，分析過囉。依家嘅閱讀理解好似做解剖咁，唔係淨係要認識器官內臟，要知死因，係要知道用乜嘢技術就可以將器官內臟死因呈現出嚟。呢種閱讀欣賞系統係將閱讀欣賞規範化。將文章拆骨煎皮，然後將佢每骨每皮每器官都俾個名佢，俾個類別佢，俾個性質佢，俾個功能佢，俾個狀態佢。搞埋啲乜嘢內容理解，段落主旨大意，结構作用，寫作手法，比較，評論………等等。越搞越複雜，倒果為因，化整為零，易於學習。再又閱讀理解推用為寫作能力。咁先至係對閱讀理解嘅理解。
武術搏擊係寫作，將武林秘笈煎皮拆骨分為不同嘅套路就係閱讀理解，學識咗唔同嘅套路，融滙貫通，見到其他門派嘅秘笈，就睇通其他門派功夫嘅利弊強弱，搏擊時就得心應手啦。

所以搞清楚閱讀理解係操乜，係操套路，認識套路就可以明白武術嘅精華。打套路最初得個形，不得其實。隨著時日鍛鍊就能領略武術。所以重點要放喺套路，讀拳; 一見拳手出招就立即可以講出招式作用同埋拆招技巧，咁你就掂晒。讀拳係乜？有句英文係Said easier than Done。即係「講...就天下無敵; 做....就無能為力。」又有少少似阿媽教阿仔讀書咁呢。即係，阿媽成同阿仔講：「衰仔！打少啲機啦。溫多啲書，考試自然成績會好嫁啦。」明唔明？明D唔明B? 好！我或者再用另一個大家日常生活經常遇到嘅處境更具體咁將呢種微妙關係呈現出嚟。
就好似成班friend一齊睇波咁，睇到興起....《蘇亞雷斯右邊大禁區一扣一推落底線，美斯步住個12碼點個位無人看管....阿蘇再急停一扣，左腳腳面一趟遠柱!!!!!!! 柱邊出界...... 》呢個時刻，Ben Sir 嘅廣東五虎已經疾走縱橫，可能連「抵你老母威」都出埋嘞。有人會話：「X! 射近柱吖嘛！遠柱又唔就！」又有人會話：「贛X! 彈俾美斯啦，seven，空晒呀喂！」重會有人會分析：「阿蘇推落個下再快啲，扣個下要再急啲，左腳定少少推多半步⋯⋯唔洗多嘅，將個射門角度放大啲，射近射遠都得嘛。如果，個陣時美斯真係空晒，再俾個假腳扮交，龍門一失位，輕輕腳內檔趟近柱死位咪實食無黐牙囉！拾下拾下咁！」
點呀？明晒啦。呢樣嘢做得好，分分鐘可以發大達。有好多高尚嘅職業都係做緊呢樣嘢。好似就係乜乜評論家咁。名畫評論家、名酒評論家、電影評論家、文學評論家、時事評論家、政治評論家........等等都係識講唔識做嘅，但係你偏偏要靠佢哋解釋先識欣賞，吹咩！
坊間其實已經有教你睇秘笈嘅套路攻略。呢啲攻略就係喺「無壓閱讀」KO對手攞Bonus marks嘅秘技 – 理解閱讀就可以閱讀理解。