做咗當做到 • 用決心重組筆劃 精選 推薦

以前有本書係講你老豆嘅，話俾你知點解你老豆成日都無乜錢剩，窮到餐揾餐食餐餐清。另外，佢又教你老豆點樣唔使太複雜就可以搞下搞下變成有錢人。

另外有本書叫你用成萬粒鐘不斷浸淫一樣嘢，咁你就會有超凡成就。

兩本書講嘅都有一個共通點，就係持之以恆。唓！使你講咩？我堅持到就唔使四週圍揾書睇揾easy way 啦。想揾捷徑？得！但要有真心覺悟嘅準備。我哋一齊睇下幾個唔同年代登頂嘅NBA球員，佢哋可能存在咗乜嘢嘅差異呢。
Michael Jordan, Kobe Bryant, Leborn James 係被譽為统領屬於佢哋年代嘅NBA球員。佢哋登頂奪冠嘅次數分別係MJ 6次，KB 5次，LBJ 3次。成為Final MVP (總決賽最有價值球員)次數分別係MJ 6次，KB 3次， LBJ 3次。總決賽奪冠成功率MJ/100%， KB/80+%，LBJ/ <30%。單係睇呢幾個數字，MJ係赢晒嘅！A，唔好鬧住，佢哋三個都係最最最勁嘅，唔使講嫁嘞。其中有兩個仲係勁到無朋友tim。要比較佢哋邊個勁啲根本就係粉絲以外無意議嘅討論。佢哋三個毫無疑問努力到不得了，所以乜嘢持之以恆呀，一萬小時呀佢哋都做爆晒。成功嘅共通點佢哋都有齊，而MJ有咁高嘅hit rate可能同佢經常提及嘅determination，決心有莫大嘅關係。

曾經有一年嘅東岸決賽第七場，比賽前佢公開保証佢哋會赢，最終佢做得到。作出咁risky嘅保証，有幾多個人夠胆講吖？就算你有信心講呢句說話，都要有無比嘅決心先可以將呢份信心實踐。絕對唔係吹咗先算。
要體現到「決心」嘅力量，就要有做得到嘅決心，信念，智慧同埋能力。決心唔係盲嘅，唔係一咪茸低頭死砌爛砌就係決心。無論你幾勤力，幾拼搏，幾委屈，幾用力，如果都係做唔到件事，你只係做咗嘢，並唔係做到嘢。呢啲就係「做咗當做到」，不如回家湊寶寶。如果係咁越做得多就越晒料，唔做好過做啦。做咗個咗同做到個到字都係八劃，用決心將呢八劃調嚟調去重組搞搞佢，做咗就變成做到。調下筆劃咁簡單就做到，你同我都得，無難度。

決心係要有做到嘅覺悟，無論用任何方法，任何方式都要做到件事嘅覺悟，對成功渴求嘅覺悟，要有犧牲一切，達成目標嘅覺悟。要有绝不放棄嘅覺悟。夠唔夠熱血？咁多個覺悟反映咗決心係心態主導嘅醒覺。即係要有好好好澎湃嘅正能量推動你嘅內心真心相信並認定必定有方法可以做到件事。太複雜？求其舉個例子簡單化成件事。
打籃球 - 決心要提升投射命中率。每日做射球一萬次嘅練習，係咪乜都唔理，練一萬小時就算做咗，就一定會成功呢？如果你射球嘅方法係錯誤，咁你只係每日將錯誤重覆練習咗一萬次。做唔到提升投射命中率嘅目的。即係晒料兼打倒褪(吞粤音第五聲)。即係持之以恒一萬小時都係做緊錯誤嘅嘢，咁又點做到目標呢。

要成功，就係要有想盡辦法揾到正確投球嘅練習方法，然後每日苦練正確投球一萬次嘅決心。所以決心呢樣嘢唔係盲嘅，係要思考嘅，係真心相信一定有正確方法可以做到嘅信念。

由今日起，遇到任何事都正面相信一定有解決方法。只係諗做乜嘢可以令你做到件事，唔去諗咁咁咁所以無可能做到件事。你有呢種決心，呢種覺悟，你就體會到決心帶動出嚟嘅力量，你就會覺得無嘢再難到你。咁樣係一啲都唔難，係好容易嘅事，因為我試過，享受過決心帶嚟嘅樂趣，自信心返晒嚟，仲好high tim。唔信? 咪試下囉，你又無嘢輸嘅。