閱讀理解 • 理解閲讀 （三）定律 精選

應付閱讀理解呢個敵人，千祈唔好俾佢嚇嚫。温下書先。

對付敵人，要盡快了解你的敵人。
要擁抱你的恐懼，就可以繼續前進。
唔好怯呀，怯就輸成世嫁嘞！

咁你理唔理解自己驚乜吖？知道驚乜嘢或者唔知驚乜嘢。又或者唔知道驚乜不過淨係知道驚，好驚，真係好驚.....驚到爆咗。

你想同人講，尤其喺長輩老師等等.....佢地通常企係三十九幾樓咁高嘅道德高地指引你：1） 「都唔知你驚乜？」、 「有乜好驚啫？」 - 即係都無嘢好驚，唔識係你嘅問題。
2） 「唔洗咁驚嘅。」 - 即係你使唔使咁驚，會食人咩？驚成咁？乜你咁細胆嫁？唔夠硬淨，又係你自身嘅問題。
最常見回答，
3）「做多啲就識嫁啦！」 - 即係你唔夠勤力，又或者係蠢，都係你自己有問題啦！ 喂！阿Sir, 做一次都徬徨到死啦，重要自己整蠱自己多幾次？玩嘢咩？
其實以上三個回答都可以好真啱，但令人難以理解，都係閲讀理解出嘅問題。試圖理解佢背後真理，會牽涉到一個好勁嘅term – Problem Shooting. 呢味嘢可以handle uncertainty.
Uncertainty 是「不確定」。即係打麻雀每次摸牌都唔知係乜嘢牌咁。「不確定」係有性嘅，仲有高有低tim。就好似，嗱好似咋，自己叫胡叫三飛，上家打隻牌出嚟，食得；但輪到自己海底撈月。食定唔食定搏撈月？？？人生交叉點！如果啲食糊牌已九成落咗地，不確定性就低，咁就食咗先講啦！不過，如果啲食糊牌九成未出，哈！咁就𢱑到頭髮甩晒都搞唔掂........有好多人話搏，不過仲多人話食咗先算；嗱！咁不確定性夠唔夠高？

要排除uncertainty，就要理解你驚乜。同學們，你究竟驚乜，你咪係怕唔識點答囉。喂，專業啲好喎。乜嘢叫「怕唔識點答Law」，Law係呢度解作定律，即係「怕唔識點答定律」。同學們拎住條題目，又唔係完全唔識答，反而心目中有幾個答法，舉棋不定，誓願誓咗成個鐘，醒返都未肯定出邊招，輸梗啦，此乃定律。
想做到見招拆招，就要操套路。根據維基百科: 武術套路是一連串含有技擊和攻防含義的動作組合。是一些臨敵攻防時的拆解技巧，把這些技巧凝固為「招式」，並且把一連串攻防常用的招式串連為「套路」，供紀錄及平素操練時使用的習慣。
操套路就係操攻防招式，化作閱讀理解就係「你咁問呀我咁答Law」。「你咁問呀我咁答定律」就係KO「怕唔識點答定律」嘅不二法門。

同學們，消化下先啦。