愛是.............? 精選

你爸爸以前係個地盤工人
跟其他人一樣,佢都係一個典型既地盤佬
英文唔識多隻,講野又大聲,講粗口之後當然唔會打冷震,仲好流利添

你七歲果年,有一晚,
你係你爸爸收工返到屋企果陣,同佢講左句「喂喂,老豆你好臭啊,走開啦」
你爸爸笑住講左句「Hi 你」,唔單止冇走開
仲特登走埋黎攬住你,仲錫左你塊面一啖
果陣時你雖然覺得佢真係好臭,但唔知點解,你唔想推開你爸爸
十七歲果年,同樣,有一晚,
係你爸爸收工返到屋企果陣時,
你發現佢體格已經冇以前咁魁梧,髮線開始後移
唯一冇變既,
就係佢果陣夾雜住泥水、塵、汗水仲有你認唔出既臭味
不過你冇講出黎
你爸爸可能睇得出你心入面點諗,佢望左你一眼之後,
淨係講左句「覺得頂唔向左走向右走順就去休息下,讀書其次,身子要緊」,
之後就去左沖涼
而你亦都快快腳走返入房,唔想再聞果陣殘留係廳入面既臭味
廿七歲果年,
你已經繼承左自己爸爸衣缽大大話話都五年,
其實都有差唔多七年時間,
而你爸爸係你十九歲果年因為永久性工傷,已經冇再做,
讀左個你都唔知邊度有得讀既課程之後,轉行去左做日更保安
有一晚,你收工返到屋企門口,
發覺自己冇帶鎖匙,咁唯有禁鐘,要爸爸開門畀你
爸爸開完門畀你之後,
你發現爸爸定哂神咁望住你.
你畀佢望到好唔自在
突然,佢講左句
「好向左走向右走臭啊Hi 你,去沖涼啦」
之後當然係兩父子之間好有默契既大笑 而係職場浸淫左五年既你,當然都係唔少前輩身上學得一口流利既粗口
你地兩個互Hi左至少兩分鐘,你先入房拎衫沖涼
但過程中,你爸爸同你相隔只不過兩步距離

三十七歲果年,你個仔仔六歲
有一晚,你返到屋企果陣,你仔仔同你講
「喂喂,老豆你好臭啊,走開啦」
你笑左一笑,你冇講「Hi 你」,
但講左聲「係咩?」之後就攬實佢,迫佢索你個心口
雖然你老婆Hi勁你話仔仔已經沖左涼,
但你仔仔又覺得好好玩,笑得好開心

同個仔玩完一輪之後,你終於有意識想去沖涼, 呢個時候,你同仔仔講左句:
「今晚要早訓,聽朝早d起身,一齊去拜爺爺」