嚴肅影評系列:《西遊中伏篇之𠝹爆你張凳》

論評影電 於 10/03/2017 發表 收藏文章

Photo source: https://www.hk01.com/
爛片嚟講呢,根據美帝B級片大師羅傑·科爾曼嘅說法呢。應該係由外到內,再由內去返外的。

星爺同徐克嘅《西遊伏妖篇》屬於第二個層次,佢直頭係內外都爛得血肉模糊,堪稱爛片界奇葩。

以下內容嚴重劇透,留意返。

鬆散,劇情極度嘅鬆散。這部續集講嘅係唐僧幾師徒降魔伏妖嘅故事。當電影充斥住大量角色同場景嘅時候,最好就係有一條主線將所有嘢串聯起來。

西遊唔單止主線欠奉,整個故事感覺只係將幾集單元劇生硬咁拼湊埋一齊。由馬戲團表演、到蜘蛛精宴會、跟住嚟到比丘國,最後係白骨精嘅挑撥,基本上完全冇連貫性,劇情虛弱過空虛公子。

嘈吵,每幕都過分地嘈吵。片中嘅孫悟空絕對係患了無定向喪心病狂間歇性全身機能失調症,一時衝過去毆打豬八戒,一時就叫人重擊自己。然後就係唐僧對大弟子嘅虐待,不斷大叫「死馬騮」,不停地唱嗰首懶係幽默嘅兒歌三百首,無限loop ,直到永遠,阿門。

正當你以為導演俾你鬆一口氣嘅時候,又輪到紅孩兒對住你怪叫,國王喺度扮低能仔搞gag 。師父,我耳仔好L痛啊,放過我啦。如果戲院裏面有人夠薑即場賣耳塞,一定極速清貨,正過擺年宵。

賣弄,不停地賣弄特技。勁啦,耗資4億人民幣。叻啦,《阿凡達》團隊擔任顧問。知啦,徐老怪個《智取威虎山》好收得,特效好威威呀嘛。

今次到呢套,佢就索性由頭到尾不斷玩CG,整咗幾隻擁有八隻腳,嘔心到極點嘅蜘蛛精,個樣仲要混血feel,係mix伽椰子加貞子,個種殺氣絕對可以同怪形入面嘅異形分庭抗禮。未玩夠,就再加隻識變機械人嘅紅孩兒,臨尾孫悟空仲要變成巨大石猴同假如來佛隻抽。徐克完全唔明白less is more 嘅道理。唔知我以為睇緊變形金剛,睇爆破睇特技我唔好去睇Michael Bay?人哋有Megan Fox添呀,你有冇呀?

最離譜係佢仲要加插一幕伽椰子蜘蛛精同豬八戒法式濕吻嘅情節,新年喜劇需唔需要咁重口味啊?我仲要帶咗兩個細路入去睇,佢哋如果有童年陰影,徐克你係咪賠湯藥?

翻炒,瘋狂地翻炒舊作。紅孩兒嘅天兵天將抄功夫琴魔嘅鬼卒,孫悟空高呼打我就抄火雲邪神。電影裏面翻炒嘅例子多不勝數,我明白橋段來來去去都係咁,但係抄到九成似,真係毫無誠意可言。

你話睇周星馳,好笑咪得囉?劇情橋段垃圾有乜嘢所謂。我依家就係同你講唔好笑呀!全場由頭到尾冇觀眾笑過,我以為去錯咗隔離睇La La Land。

你睇得出佢好用力想迫你笑,用咗好多不必要嘅毆打情節,醜角亦都用力賣弄,但效果極度唔理想。

我望一望隔離嘅中年阿叔,佢個樣生得有啲似回魂夜嘅盧Sir,當佢再次聽到唐僧喺度唱兒歌三百首,我見到佢面容瞬間扭曲,表情痛苦,狀似便要鮮血狂噴。我依稀聽到佢內心嘅讀白:
「大佬呀,你唔好咁黐線啦。頭先嗰幾幕激到啲死忠好嬲呀,你而家算點呀?」

睇完果晚我發咗個夢,我見到全盛時期秒殺所有IG 女神嘅春三十娘藍潔瑛同紫霞仙子朱茵。

春三十娘調皮咁講:「你當佢Cult片咁睇,個觀感就fit 哂。」
然後仙子又悲傷咁話:「算啦,至尊寶。佢回哂塘啦。」

我虎驅一震,仰天長嘯,大聲講:「算咩算。我好嬲呀,黃貫中呢?我要同佢合唱我是憤怒!」

醒返嘅時候,我塊面流咗兩行清涙。哥流出的不是眼淚,是回憶,是悲鳴,是所有星爺影迷嘅吶喊。嗚呀,俾返之前嗰個周星馳我呀!

如果喜歡我們的文章,請即分享到︰

標籤: 周星馳  西遊伏妖篇  徐克  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→