泰國靈異 - 芭提雅之旅 (一)

泰國奇遇 於 11/03/2016 發表 收藏文章
之前在討論區寫過親身經驗,引起一時間的巨大回響,決定在此重新上載,還有續寫發生在泰國的靈異故事。

本人已經第五次去泰國芭提雅,今次人數最多,有七個人。
之前去咁多次都無事發生,但今次人多就出事喇。

七個人入面,有三個唔係太熟,佢地最尾三日 後JOIN的。為左遷就呢三個人,我地中途轉左間較便宜的酒店。
之前個間酒店價錢比較貴,但真係好靚,露台一跳出去就係泳池。
呢間S字頭酒店,一入到房我第一句就 :「咁X污糟ge!」
牆角遍佈蜘蛛網,傢私擺設全部都好舊,個網頁仲話2012落成,點睇都起碼有三四十年。
但無辦法,因為已經比哂錢。

我地四個自己友住5樓,四房相連的,而佢地三個住4樓 就分別住獨立房。
七個人,七個都係男仔,如果同你講七個男仔去芭提雅只係遊山玩水,咁你都一定唔會信。無錯,所以我地預左一定會有艷遇,就每人一間房。

入夜之後當然係去飲酒溝女,雖然而家比起韓仔係輸蝕d,但離港後都仲有一定魅力ge。
一覺訓醒,聽到房出面吱吱喳喳,心諗咁早就係度講賽後報告。
行出廳,見到佢地個個面青青咁,原來唔係講賽後報告,係講緊琴晚的靈異事件.....

後JOIN 個三位住係4樓,分別係401,402,403 號房。
住係401號房個位朋友係 攝影師,佢飲完野番到酒店第一時間就沖涼。
可能因為酒店殘舊原因,道廁所門關唔埋,點都會有條小小空隙係度。

佢話:「反正都係自己一個,咁我唔理照沖涼喇,但係沖沖下,唔知點解總係覺得間房度有個人行來行去。」
因為有條空隙的關係會見到廁所門外的房燈,但就又光又暗咁樣,眨下貶下,就好似有個人係廁所門外 來回咁行來行去。

佢話:「當我沖完涼望住條空隙,個燈仍然眨下貶下,仲要愈眨愈快,唔係行來行去咁簡單,應該直頭係飄緊,,,,
果一刻,其實我都唔係太驚因為我重未遇過呢d事,我鼓起勇氣一手打開門,
發現咩人都無。但當我行出廁所第一步....耳邊竟然傳來一把女仔聲.....仲要聽得非常清晰......說了一句泰文」

因為攝影師唔識泰文,所以個一刻唔知意思係咩,仲諗會唔會係自己錯覺。
我地問: 「咁你記唔記得類似個音係點?」
因為住係403號房個位朋友,佢係泰國通,佢住左係泰國8年,應該會知道意思係咩。

攝影師: 「我記得係3個音,好似係 "預亨亨" 」
泰國通頓時面色一沉: 「個把女仔聲會唔會係講緊"yuu kaang kaang"」
我地問: 「即係咩意思?」
泰國通:「意思即係........"係你隔離".....」

"係你隔離".....我地個個望住位攝影師。

攝影師因為以為係自己錯覺,所以冷靜下來吹個頭就訓覺了。
訓左一陣訓唔著,拎左部macbook 出來執相。

佢執相執到太約凌晨三點幾到,突然部電視機自動開著左,個音量仲要係開到最大。
果一刻佢真係嚇親,直接拔左電視機個插頭。講到呢度.....

403號房位泰國通話:「唔係咁邪呀,我房部電視半夜都自動開著左.....」
我地即刻問住係402號房位 型男髮型師:「琴晚有無咩事發生,電視有無自己開著??」
髮型師:「無wo...無事發生wo..」
因為佢靚仔原故,琴晚確實有豔遇,帶左位泰妹回來。
泰國通用流利的泰語問位泰妹琴晚有冇發生咩事....
位泰妹即時苦笑.....

泰妹話:「雖然我第一次來呢間S字頭酒店,但都聽過唔少傳聞。
琴晚訓覺果陣,除左髮型師呼吸聲之外,我仲好似聽到另一把呼吸聲。
小小醉唔太肯定,但係......
訓訓下,感覺有人用手摸緊我對腳,仲要用雙手慢慢摸上去。」
個泰妹做埋個動作示範,就算聽唔明都知道佢講緊咩。
泰國通繼續幫泰妹翻譯:「我用張被遮住自己個頭,唔敢望,但感覺雙手就愈摸愈上,諗緊會唔會係髮型師手多多
一揭起張被....床尾咩都見唔到....只見髮型師熟睡中...仲要隔得幾遠下....」

聽完我心諗會唔會咁邪呀,雖然我住5樓房相連,但係尾房來,仲有兩日點捱呀....今晚點都溝番個泰女番黎同我訓

「有野要做,我番去先喇。」
泰國通一句咁敷衍的理由,就急急揸車回去曼谷。
留底我地六個......
我地無諗過轉酒店,只係不斷咁同大家講「無事ge...」

好快又到夜晚,當然寧願出去飲野都唔會想留係酒店。
肥仔:「我唔係好舒服,唔去喇......」
「唔好玩喇,行喇!!」其餘五個人都異口同聲咁講
因為大家都知道間酒店咁猛,佢仲咁夠膽夜晚自己一個留係度。
但肥仔仍然好堅持,話自己真係唔舒服,食左藥想訓覺,一手就關埋左房門。
我地其餘五個人就照外出,唔理佢喇

飲酒跳舞溝女,睇黎大家都已經忘記左琴晚的事。
當然我仲記得喇,所以最後我都帶左個女仔跟我番去。
番到酒店已經三點幾,原來都已經飲左咁耐。
我係第一個回去酒店的,因為四房相連,而我係尾房,所以順路會經過肥仔間房。
發現度門鎖左,而隱約聽到肥仔同一把女仔聲傾計。
心諗「條死肥仔又話倦又話唔舒服,肯定又用wechat叫女上門。」
我都色心起,咩都唔理喇,回房先講。

完事後,我沖完涼訓左係張床到。
然後到個女仔去沖,佢沖完涼,行到我房門口,企左係度...
佢用一個好怪的神情望住我,然後佢就行左出廳....
我係張床等左五至十分鐘,佢都仲未入番來,心諗我激嬲左佢??

我行出廳,我見佢低頭玩緊電話。


去左五次泰國,普通溝通都可以。
我見佢低頭玩緊電話,但我見佢個樣好似幾驚咁,就用好唔流利的泰文問佢......
我:「tum mai? 點解? 」
泰妹: 「mai mee arai.. 無野呀..」
我:「glua arai? ..驚咩野? 」
泰妹: 「........」
泰妹繼續低頭玩電話,沒有回答。

隔左幾十秒.....
然後我再問多次:「glua arai? 驚咩野? 」
泰妹: 「glua...pee...」
"pee"呢個字我唔識聽,但果一刻已經估到意思係咩...
我即刻用google search "ghost" 泰文個讀音....
"pee....... "
間房部殘舊冷氣機明明經常發出"隆隆隆隆"聲都即刻靜左.....


明明好驚,但係女仔隔離要繼續扮無事咁....
我仲笑笑口問: 「yu tee nai? 係邊度?」
泰妹: 「hong non...睡房...」
即係泰妹岩岩係房門卻步個一下.....見到..,,,


我繼續問: 「poo ying? 係女仔黎? 」
泰妹: 「mai chai... 唔係.....」
我 :「poo chai? 係男人黎? 」
泰妹: 「ga..toie...」
聽到呢個字,我唔知笑定點好....
呢個字我第一次去泰國已經學會....


"ga toie" 意思即係 " ladyboy人妖" ........


「mai bpen rai....mai dong glua....」
我苦笑住咁講:「無事ge...唔駛驚...」
泰妹點點頭繼續玩電話。


呢一刻,我決定行去肥仔間房敲門。
敲左一陣,佢終於打開門。
腦海回想起剛剛行過佢房門時,係聽到一男一女係度傾計的聲音。


但如大家所料,一眼望哂....房入面除左佢...無其他人係度...
肥仔:「咩事呀?」
我:「自己一個呀?」
肥仔:「我一直訓緊覺wo...」
我:「哦...你唔舒服...咁繼續訓喇。」
肥仔:「正wo,有女仔跟你番黎,咁我都唔阻你喇。」
呢個時候選擇咩都唔講...當無事發生...


我行番去梳化陪泰妹,佢掛住係度玩電話,過左一陣..
泰妹:「mai mee battery ...」
泰妹話手機無電,問我有無充電器。
我話有,但係房入面......
泰妹:「mai ao laew...mai bpen rai」
「咁唔要喇...唔緊要...」
雖然泰妹咁樣講,但不知那裡來的勇氣,我決定行入房拎。


好凍,除左覺得間房好凍之外,咩都見唔到,咩都聽唔到
快快手拔走插係床邊位的充電器,再拎埋張被....


間酒店,房的設計都是床尾位有一塊大鏡...
當我一轉身...係塊鏡度...
眼尾見到一個長髮的身影...正正就係企左係床頭邊...
唔敢回頭看...只可以當自己眼花...有人陪總算係一點安慰,,,我和泰妹就係梳化訓覺 渡過呢個凌晨...


最後一晚,我地全部人玩到天光食埋早餐先回酒店
然後直接執野check out 走人...
我,肥仔,髮型師,攝影師 係最後4個人搭lift落去

但當我按了一下關門制...正當要關上時又自動打開...
再按一下...OPEN的顯示燈亮起...門又自動打開...
按第三次,仍然是這樣....

我伸個頭出去望:「邊個玩lift呀...」
裡面各人你眼望我眼,眾人心諗:「唔通唔想我地走...定已經入左來...」

回港後,肥仔同攝影師.....佢地病左成個月...
反而我同髮型師就無咩事....

攝影師仲專登走去睇師傅,,,,,求左道符,,,
肥仔仲要清行李洗衫果陣發現左件不知名的女人底衫....

雖然如此..但我仍然十分喜歡泰國...
所以岩岩都去左成個月....

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→