仲拎住自拍神器？不如買部無人機 精選

近年個個都鍾意周圍玩自拍，所以無論手機定係數碼相機廠商，全部都爭住鬥出自拍神器。不過下下要拎住部機周圍走，影相時又要死命伸長隻手等全部人都入到鏡，都咪話唔麻煩。所以大家又會見到有人拎住枝自拍桿，咁就唔洗隻手咁辛苦喇……不過自拍桿呢家野真係見人見志，個人就覺得同阿婆係屋企晾衫既晾衫竹冇分別(逃)……
咁究竟仲有乜野解決方法呢？近日發現左一部叫做 Hexo+ 既「無人駕駛直升機」。不過唔好俾佢個名呃左，佢唔係用黎載人既，所以體積只係同普通遙控直升機差唔多。呢種無人機有咩咁神奇？簡單黎講，就係一部識飛既自拍神器。只需要將佢同 GoPro Camera 駁埋，然後同隻手機app連結，部野就識得起飛，跟住被攝主體進行空中追蹤拍攝，同埋按照主體既方向、動作等等調節拍攝角度。成個過程完全自動化，唔需要用家進行任何操作或者遙距控制。再加上佢既輕便設計，唔用既時候可以成舊摺埋放入背囊，所以無論係玩緊滑板、roller、划艇，搞緊沙灘 party 或者 BBQ，甚至係行山同埋花展，只要帶住部無人機，就唔使擔心影唔到靚相靚景啦！早前 Hexo+ 係美國搞 Kickstarter 集資，總共籌到百幾萬美金，令佢地既 project 得以繼續順利進行。而家係 Hexo+ 官網都仲有得預購，不過價錢都幾貴，每部最少盛惠 949 美金，而且唔包 GoPro，係香港呢個咁擠逼既城市究竟 hit 唔 hit 得起，都仲係未知之數。

圖片來源：hexoplus.com