X

拍拖的心理戰術!

VOID心理學教室 於 27/11/2018 發表 收藏文章

#編按:嚟緊呢篇希望可以更有趣,所以會教大家點樣係拍拖上運用心理學知識,請大家不帶批判,純粹以欣賞輕鬆小品嘅角度睇故事!

我叫阿希,心理學系畢業。話說一日激嬲女朋友阿欣十萬次嘅我,因為讀心理學,有一兩招心理戰術防身,避過咗好多大劫。

例如講番起有一次,想同朋友出去飲酒睇世界盃⋯⋯

「吓?你又唔陪我啊!」我就梗係估到女朋友會咁講,咁就當然唔會直接問啦。

*以退為進法(door-in-the-face technique)勸說者通過提出一個會被拒絕的離譜要求來讓被勸說者同意第二個較為合理的請求。

我:「呃⋯⋯你知啦,一年一度嘅世界盃又就到啦。」
阿欣:「你想點啊?直接講啦。」
我:「阿強阿德話想約我下個星期呢係佢哋屋企留宿一齊睇世界盃!」
阿欣:「⋯⋯」(火焰燃燒中)
阿欣:「啫係成個星期都陪唔到我?」
我:「係啊,哈⋯⋯」
阿欣:「⋯⋯」
我:「⋯⋯」
阿欣:「你無野啊?為咗睇世界盃成星期唔陪我?到底睇波重要定我重要啊依家!你咁鍾意足球不如同足球結婚啦⋯⋯(下刪一萬字)」
我:「你冷靜d先⋯⋯咁⋯⋯既然你咁唔想我去,我就留低陪你囉!我只係去一晚好無?」
阿欣:「算你啦<3」

其實邊有咩留宿啊,講咗留宿先,再話其實只係去一晚,咪即刻風平浪靜囉。以退為進法,因為提出第一個離譜嘅要求一定會被對方拒絕,而令到對方會有內疚嘅感覺,當你提出第二個合理要求嘅時候,對方亦會覺得你有讓步而答應該要求。所以第二個要求要喺第一個要求後立即提出,因為對方嘅內疚指數喺呢個時候係最高嘅。

我係阿欣,雖然我唔係讀心理學,但陪阿希溫書溫得多,我有時都識用下d心理戰術⋯⋯最近好難得先keep fit成功,去沙灘影咗d好靚嘅泳衣相,好想用嚟做pro pic,但阿希一定會話:「唔准!」

*得寸進尺法(英語:Foot-in-the-door technique)是一種通過先提出一個簡單的小請求來說服被勸說者同意一個較大請求的勸說方法。

我:「阿希,我好想比大家見到我減肥嘅成果啊~」
阿希:(扮聽唔到)
我:(繼續講)「好難得影到一輯咁靚嘅相!」
阿希:(繼續扮聽唔到)
我:「喂你有無聽緊我講㗎?」
阿希:「嘩係喎!真係好靚喎!」
我:「⋯⋯」
阿希:「⋯⋯」
我:「咁呢⋯⋯我可唔可以post係ig story啊?你諗下,大家都可以見到你有個咁靚嘅女朋友喎!」
阿希:「⋯⋯」
我:「你唔會咁小器嘅~」
阿希:(心諗:ig story 都係維持一日啫。)「唉好啦好啦。」
我:「我幾時都話你最大方㗎啦!」
過咗一日之後。
我:「阿希,唔知點解呢⋯⋯個ig story好似無咩人睇到,我可唔可以轉埋propic?」
阿希:「⋯⋯」
我:「你唔會咁小器嘅~」
阿希:「好⋯⋯囉。」

阿希好勉強咁答應咗,呢種情況係未似曾相識?你有無試過明明唔想做某件事,但開唔到口拒絕?得寸進尺法運用人對一致性(consistency)嘅需求,亦啫係我哋希望自己係別人眼中係言行一致,同帶有固定立場。所以對阿希嚟講,佢答應咗第一個要求,會令人覺得佢唔太反對「女朋友放泳衣相上social media 」,所以當我提出第二個要求嘅時候,佢好有可能係咁諗:「雖然我都唔想佢咁做,但之前佢話擺相上ig我話ok好似好大方咁,而家突然咁小氣好似怪怪地咁⋯⋯咁唯有應承啦。」

#編按:比起點樣用呢兩種方法說服人,大家更加要留意自己幾時跌入咗陷阱,因為呢兩個心理戰術而答應咗自己唔願意做嘅事。其中一個方法就係將會一個要求都睇成獨立要求,唔好同其他要求比較,選擇答應要求時要單獨衡量自己對對該要求嘅感覺!

Reference: Chan, A. C.; Au, T. K. (August 2011). "Getting children to do more academic work: Foot-in-the-Door versus Door-in-the-Face". Teaching and Teacher Education. 27 (6): 982–985. doi:10.1016/j.tate.2011.04.007.


#love #psychology #愛情 #拍拖 #心理學 #女人真係好蠱惑

喜歡請讚好專頁/分享,謝謝~

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→