【#港生活】試飲報告 - 「Kirin 一番搾 若葉香」季節限定釀造

過去一個星期真係悶熱到一個點,尤其是每當去到夜晚,上下左右、對面座樓嘅鄰居都開齊冷氣,若果你唔開屋企就仲會再熱D!指定動作夜晚除左要飲杯 White Wine 甚或 Sparkling Wine 消暑之外,冰凍嘅啤酒對唔少人黎講都可以話係必需品。今次 Derek 就同大家介紹最近試飲過一款季節限定釀造啤酒、黎自日本嘅「Kirins 一番搾 若葉香
麒麟啤酒(日語:キリンビール),全稱係麒麟啤酒株式會社(日語:麒麟麦酒株式会社;英語:Kirin Brewery Company, Limited),前身係喺明治3年 ( 即1870年) 由挪威系美國人威廉·科普蘭創立嘅「科普蘭啤酒」,同時亦係首家生產啤酒開放銷售予一般平民大眾的啤酒公司,堪稱國內啤酒產業先驅。
時代巨輪底下,科普蘭啤酒轉變為三菱財閥旗下嘅日本國籍公司「麒麟麥酒」,及後生產量逐漸增加並於 1954年 獲得全年出庫量佔有率首位,直到朝日啤酒「Asahi Super Dry」台頭之前,麒麟都算是擁有日本國內啤酒業界首位的位置。
我諗熟悉日本文化、有厚實嘅飲 (隊?劈?) 啤酒經驗嘅各位一定會知道,「一番搾」其實係一種製法,僅會使用於過濾程序中最先流出的第一道麥汁釀造,而今次呢款 “若葉香” 就喺最後階段先加入日本鮮嫩嘅「IBUKI槐花」以保存香醇氣味。
呢種「一番搾製法」最大特色係由於麥殼釋出的單寧酸比例較少,可以將麥芽原有的芳香美味原始自然呈現,口感則傾向爽口、順暢、高級、甘醇,個人就認為有 D 近似冷泡茶嘅原理;而一般啤酒都會係以「一番搾」與「二番搾」麥汁混合製造;至於「二番搾」就會將已經濾過一次嘅麥糊渣加熱水再次濾出麥汁,單寧酸含量更高,口感較苦澀及重口味。
引用喺台灣,呢款啤酒産品嘅廣告標語係咁講嘅:

「喝一口KIRIN一番搾り若葉香啤酒,瞬間就像躺在柔軟的牧草上!
開罐後深呼吸,就能感受春夏交會的此刻,嫩葉初發的清新氣息🌿🌾🍺,
入喉更柔順地伴著啤酒麥香,彷彿草波麥浪都在你口中輕輕低唱,“第一次喝下一片草原”」


見到佢講到咁,認真係會蠢蠢欲動想試下嘅〜
至於味道如何?老實講係好飲、幾唔錯,亦都真係好似包裝上說明嘅「若葉香」咁形容,前幾口飲落的確係有淡淡嘅乾草、樹葉般味道;再飲多少許試得細緻D,就真係會覺得係有種「好日系」啤酒嘅風格:味道細緻、清新之餘帶點甜味,餘韻則陣陣回甘,容易入喉;而且個人意見認為罐上包裝設計上應記一功,有種田園印象派、春夏季節嘅感覺。
特別係小弟喺歐洲 (特別係德國) 居住呢一年間,飲過嘅啤酒都係偏向果實果味、麥芽味比較重的類型;偶爾品嚐一下「小清新」的味道,又的確係一個唔錯嘅選擇,尤其係睇番呢次「Kirins 若葉香 一番搾」嘅味道,亦可以好容易跟日式料理如壽司或者係燒物組成簡單配對,而我自己身邊嘅女性朋友就表示「唔太重酒精味亦都唔苦、幾香幾易飲」咁話喎,跟住就飲一又多D ..... 所以我就順理成章將佢解讀為適合女仕飲用啦(≧∇≦)

*Pictures sourced from Internet *[/size]
---------------------------------------------------------------------------------------------------------------
Derekc:一個土生土長嘅80s香港人,過去的十年庸庸碌碌的工作、學習品酒到於德國葡萄酒莊工作、鐘情於葡萄酒生活態度並希望將其推而廣之;有過一段外地生活體驗、一場意想不到的人生。如果大家喜歡我嘅文章請點按讚及分享到你的社交平台;另外如果大家有希望想睇到葡萄酒題目亦歡迎聯絡我,又或者可以傾下酒經 〜

Instagram : https://www.instagram.com/derekc_c/

Facebook Page : www.facebook.com/Wine.Life.Style.HK

留言


請按此登錄後留言。未成為會員? 立即註冊
    快捷鍵:←
    快捷鍵:→