我就係偏心爸爸~ 精選

尋日係一年一次既爸爸節，有無記得好似媽媽節咁孝敬下爸爸呢？
雖然古往今來大家大多只會歌頌媽媽懷胎十月生呢舊叉燒出嚟，
可憐如我媽遇上硬頸既我，痛完一輪最後仲要開刀生，
但大家忽略既係，當媽媽同我分別訓係病床同氧氣箱時，有一個叫爸爸既人係要兩邊病房跑，
照顧我地大小兩個女人。

爸爸一直好錫我同媽媽，凡事都以我地為先咁，對我就更加好到加零一，我要咩佢都儘量配合。記憶中佢無點打過我鬧過我，不過正正因為咁每次佢鬧我打我，我都特別認真對待，特別記得。
例如我到依家都記得佢有次打左我一巴，我一個星期無同佢講野。但，亦僅此一次而已。

佢對媽媽都係典型口硬心軟，媽媽最討厭做家務，所有家中大小二事基本上由爸爸一手包辦，
煮飯打掃咩都係佢，最慘係佢經常早出晚歸過我同媽媽. ☹
佢有時頂唔順邊做邊鬧，媽媽就次次當佢唱歌，偶爾回罵，我覺得爸爸次次都係悶左一肚氣但又奈媽媽唔何
所以我依家得閒都會少少做下家務幫輕下 -_-
一直覺得自己應該要再對爸爸好d，仲因為好多野佢都留最好比我地兩個女人，
典型 ”闊佬人地孤寒自己“ :P
媽媽又去過美國去過歐洲，佢就連日本都未去過；
我地每人兩個衣櫃都嫌唔夠位，佢就得兩個小櫃桶放衫；
我買貴d既野比佢，佢係咁話唔合用，但我覺得佢係唔捨得用。
仲有好多好多例子都不能盡錄，雖然佢好似無所謂，媽媽又好似覺得都幾理所當然，
但我看在眼內，始終覺得應該要搵機會多d對爸爸好。

所以今年佢生日，美術永遠攞D既我親手畫左張比火柴人好少少既卡寄比佢；
所以今年爸爸節，我請佢去戲院睇戲（話說爸爸只係入過戲院睇過3次戲，每次都係同我睇，最後一次已經係101斑點狗......令我呢個中學大學時期唔知睇過幾多次戲既我非常內疚）；所以今年爸爸節，我係咁依請爸爸食左餐飯。

其實大家只要留心多d，會發現爸爸既辛苦絕對不亞於媽媽。
起碼媽媽既辛勞一直比人擺上枱面熱烈地歌頌，媽媽點都得到d精神安慰。
反觀爸爸呢個唔出聲大家就當佢唔care既角色，其實佢更加需要我地

媽媽當然有呷醋，話母親節佢咩都無，話佢生日又咩都無，
唉！其實你只係今個生日，今個母親節我忙所以無姐，
爸爸之前10＋個父親節都無啊你就比佢威番次啦 :)