一開聲就有壓力點做Present？

壓力呢樣嘢係動力定係阻力？好睇自己本身狀態，都市人有壓力影響下，通常係身體上面表現出嚟，例如要做Present嘅時候，你對住老細對住個客對住聽眾，就算對方係認識定係唔認識，都會有啲緊張感，一緊張就有壓力，最後就會影響成個演講水準，明明已經準備充足，反覆練習篇講稿，點解仲係手騰心跳兼口震呢？
用對的方法練習
除咗對住塊鏡練習演講，仲可以錄低演講內容自己聽返，咁你就會知道有邊度不足，例如聲線嘅高低抑揚頓挫，聲量嘅大細，邊個位講得唔夠信心，如果可以搵個人，做你聽眾聽下就最好啦，可以即時比意見你改善，內容雖然係重要，但係演講嘅過程你同時係Present緊自己，所以當你可以好有信心咁講出嚟嘅時候，就可以講出一個動人故事，一切都會順理成章，變得理所當然。

搵對的方法抒壓
有啲人會鍾意養個小習慣比自己，例如演講之前飲杯可樂，揸住支紅筆等等等等，無論任何習慣，最緊要令到你個心可以定落嚟，開口嘅時候冇咁緊張，另外，輕輕拍下心口深呼吸，慢慢咁樣用4秒吸氣8秒呼氣，再留意吓自己係咪咬實牙根捉緊拳頭？ 老土講句：放鬆啲啦香港人！
給自己一個Break
Present呢啲野可能你日日都做緊，沒完沒了咁都要一個break，多啲拉筋啦！運動多嘅人受壓能力較大，因為身體肌肉血管承受緊壓力，做運動比較多嘅時候，血管擴張，肌肉冇咁拉緊，受壓能力相對咪高啲囉。

預防壓力要講出嚟，越積越多嘅時候會變到好大，到時多到都唔知從何說起，有情緒病就得不償失，希望大家每日嘅生活都可以少一分壓力多一分動力，緊張壓力感唔會完全消失，只有不同程度嘅浮現，學識面對、接受、共存，任何壓力隨時可以變成你嘅動力。
文：金金

更多打工仔分享，追蹤 ECjobsonline 專頁 或 瀏覽 www.ecjobsonline.com