【復仇者聯盟】如何在辦公室反擊麻煩同事

【復仇者聯盟】如何在辦公室反擊麻煩同事
刊登日期: 2017-10-10


每個office都總有幾個麻煩友，鐘意講是非嘅、專freeride人唔做野嘅、不負責任嘅、咩都唔識做嘅、成日曬命嘅等等，世界上真係咩人都有 ! 唔想比佢地影響的話，可以點反擊、明哲保身？等我醒你幾招啦！

1. 向上司反映
話就話好似啲小學雞咁篤人背脊唔係咁好，但如果對住啲做野慢、影響其他同事的工作進度的人，幫過佢幾次之後都冇改善，就要向上頭反映下喇！咁樣唔可以話係講同事壞話，純粹想比上司知道問題的根源。

2. 調節心理
每次遇到啲麻煩人都會好怒氣，一定要呻曬出嚟先舒服。其實人地有做得唔夠好的地方，做同事嘅應該先體諒同提出協助，比啲同理心同人地相處和溝通，咁樣先至可以達致win-win雙贏的局面架嘛！同埋諗深一層，遇着啲工作能力低的人，都總好過識到啲機心重、狡猾又唔做野的同事啦！

3. 識得say no
公司總有啲人淋滋滋、脾氣好又抵得諗，個個就睇中呢項特質，成日扮曬野塞曬啲野比佢做。對住呢啲free rider、愛卸膊、偷懶的同事，最重要就係懂得說不！表示自己都有好多野要忙，唔得閒做埋佢嗰份，等對方知道幫一次係救急，幫第二次就老笠！對住嗰啲剩係識得濫用人情嘅人，真係要懂得say no！

4. 冷靜應對、保持溝通
間間office都總有啲鐘意講人是非、打小報告的同事，如果你選擇同佢死過、鬧番佢轉頭，咁就真係中曬奸人計喇 ! 比人誣蔑、傳是非一啲都唔好受，但唔係真嘅野，講一排啲人自然就會唔記得曬，所以千祈唔好自亂陣腳、即刻報仇！否則你同對方都只不過係同一類人。怕同事相信啲流言蜚語的話，可以多啲和同事，甚至上司溝通、聯絡，傾下計、報告下自己的工作進度，讓大家對你有一個良好的印象，人地話你咩，佢地都唔會輕信啦！

5. 以無形勝有形
遇着啲八卦、扮熟的同事，最好的對策就係以退為守、沉默是金，無視對方，甚至hea佢幾句就算，無謂喺對方身上浪費時間！

6. 楚河漢界
無論係鐘意講人是非的同事，定係衞生意識低的同事，話就話最好的方法都係同佢地一刀兩斷，但一場同事，點都會有合作的機會，同佢地楚河漢界、訂立清楚的條文會更加好辦事。有同事成日搞到啲野亂七八糟、污糟邋遢，屢勸不聽的話，就應該提出制定相關的辦公室規矩，保障大家的福祉。

世界上咩人都有，何況係辦公室呢個爾詐我虞的環境呢！其實同事之間最重要就係互相幫助和鼓勵，大家多啲包容同體諒的話，又洗乜反擊麻煩同事呢？

文：Noelle

更多打工仔分享，追蹤 ECjobsonline 專頁 或 瀏覽 www.ECjobsonline.com