5個辦公室負能量源頭

10個打工仔，有11個都對返工有好多不滿，收咗工啲怨氣都冇停止過，簡直就係現實版嘅「阿愁」！其實有邊個想係咁將啲負能量散發畀人啊？無奈負面情緒就係會咁自自然然流露出嚟，自己都控制唔到！計我話，要解決呢個問題，最好就係了解一吓，你嘅負能量究竟係嚟自邊度！
日哦夜哦怨氣鬼
每一個工作環境，都總會有個人乜都哦一餐：「哇點解呢到咁架」、「搞咩啊呢到」、「激鬼氣啊」、「痴線點搞啊咁樣」，長期同呢種人一齊做嘢，日日畀佢精神折磨、聽佢咁樣發牢騷、自言自語呻足36小時，真係唔忟都畀佢煩到燥曬底！長久咁落去，真係會畀佢影響到，自己都負能量埋一份！

工作不順心
臨收工先嚟OT？辛苦諗好嘅idea畀老細ban曬？份proposal做咗成個禮拜都做唔掂？工作不稱心如意，真係好容易令到個人變得暴躁，唯有學識調節自己嘅心態，關關難過關關過啦！有邊份工係唔辛苦？之後望返轉頭，就會發覺其實都冇咩大不了啊！OT咋嘛！好閒啫！條橋畀人ban咗？咪再度過囉！你個腦都仲未function到10%，你一定仲好多絕世好橋未拋出嚟嘅！
變態老總
Office有個變態老細，真係菩薩都保你唔住！臨收工一刻先叫齊所有人入房開會！唔理可唔可行，個project都要開始咗先，做到一半再同你講剎停！鬼知你有冇做錯嘢，總之乜都鬧咗先！唔忿氣？覺得好委屈？都冇計架！鬼叫佢先係老闆！遇着呢種變態上司，簡直每日都係身處於水深火熱之中！正能量？咩嚟架？食得架？

辦公室政治
辦公室之所以令人覺得壓抑、大壓力，大部份原因係因為office有好多潛規則：唔到你想唔想，要盡量埋同事堆，自己一個會畀人講閒話；為咗升職、上位，要夠厚面皮擦老闆鞋；攰到死都要喺人前戴假面具，笑到見牙唔見眼咁；為求自保，點都要揀一邊企，同人玩小圈子。返工已經好攰，依家仲要搞埋啲咩辦公室政治，大家簡簡單單打份工唔得嘅？
迷失方向
工作多到做極都做唔曬都唔緊要，最大問題係你都唔知自己做嚟為咩！你可能會話：為咗錢囉！但當初一定仲有一啲原因吸引你想做呢份工嘅！如果你已經搵唔返最初嘅熱情，或者完全冇曬方向和目標，咁你都係時候停一停、諗一諗，諗清楚自己仲適唔適合繼續做落去？否則你只會停喺原處無限loop住：做嘢，做嚟為咩，做嘢，做嚟為咩，做嘢，做嚟為咩呢個cycle，最後成個人都冇曬衝勁、冇曬理想，同條鹹魚冇分別。

大家日日返工都有好多嘢呻，但其實諗真啲，有份穩定嘅工，有班好同事，每個月有筆咁上下嘅人工洗吓，返到屋企有阿媽煲嘅靚湯飲，人生都唔係咁差啫！負能量？Go away！

文：Noelle

更多打工仔分享，追蹤 ECjobsonline 專頁 或 瀏覽 www.ecjobsonline.com