清湯蘿蔔牛腩鍋 : 順景食店 精選

 
順景係疫情前西環火鍋既心水，無他因為牛腩好食，其他配料都對版。
幾年前唔使訂位去到直接坐低，今晚星期五已知應該會多客所以早左去。
冇訂檯七點前去到，重有走廊前既細檯坐。
兩個人既話細既清湯蘿蔔牛腩鍋已夠食。
另加半斤手切牛肉及鯇魚腩就得。
清湯蘿蔔牛腩鍋上檯。
牛腩鍋會跟上生菜一碟。
手切牛肉幾好，唔太肥食落有肉味。
鯇魚腩夠大件又新鮮。
鍋入面爽腩最多。
爽腩食落油味濃，但也相對較油膩。
坑腩牛味好濃，肉質也十分鬆軟。
呢度既辣椒油有料到，唔算太辣但有欖香，用來點肉好正。
蘿蔔超大舊但上檯前已煮得夠淋，食落都清甜。
唔好以為粟米只係陪襯，入口係估唔到咁香甜。
最後梗係要飲番碗充滿牛肉味既湯汁。
呢度冇甜品但有花生送上。

順景食店
地址：堅尼地城士美菲路市政大廈2樓熟食中心
TEL : 63398481