韓國濟州島首爾自駕自由行 Day3 (濟州金萬福鮑魚飯捲 濟州海鮮飯卷 牛島 京美家 城山日出峰 明珍鮑魚 Audrant Bakery 三姓穴海鮮鍋 E-Mart 三代麵條會館) 精選 推薦

 
今日主要行程係牛島Udo-myeon自由行。上島前先去買兩間韓式飯捲做早餐。
先到濟州金萬福鮑魚飯捲濟州本店買一轉。
見到門口塊大banner就知冇去錯地方。
室內用餐區都幾寬敞，不過因趕船所以買外賣。
鮑魚味道由飯中滲出但不突出，米飯有咬口而蛋香也夠濃。

成班人重食緊金萬福鮑魚飯捲，轉頭就直奔去另一間濟州海鮮飯卷。
海鮮飯卷帶黃白紅色彩外表比較吸引，食落醃菜味雖濃，但厚身既蝦餅味沒被掩蓋。

食左飯捲就直奔碼頭。
去到碼頭先填好兩張一式一樣既表格，一張上船用另一張回程用。填好後乘客可在碼頭售票處一次過買齊來回船票。
今日天氣好所以都唔少人坐船或駕車上船去牛島。如果想揸車上島，要係島上留宿先可以，我地即日來回所以架車就泊係碼頭停車場。
船程都係半個鐘內，睇下風景時間好快就過。
上到牛島先解決交通問題，本來想租單車、電單車或電動單車之類，但考慮過安全同時間後，決定簡單一點坐巴士，一來可以習體行動二來又安全，而且巴士班次幾密又多上落客點。
上左巴士後第一站梗係去食野先。

除非你唔食炸醬麵，如果唔係牛島炸醬麵우도짜장맨應該算係必食既餐廳。
呢間主打當然係炸醬麵，順手試埋海鮮麵。
今日好好太陽，都係坐入去室內有冷氣既地方會食得更舒服。
炸醬麵麵醬偏深黑色，同麵撈均後食落冇想像咁濃味，反而係比港式更甜一點既風味。
海鮮麵都可以，海鮮味都煮曬落湯度，所以湯同吸左湯汁既麵比海麵更吸引。

食左鹹野就到甜品，下站就試下軟滑既우도왕자이야기 牛島王子的故事既花生雪糕降下溫，同場加映清新柑橘雪糕。
來到海島又點可以唔睇下海景吹下海風。
唔少人都帶埋寵物同遊。
海邊除左海上活動重有另類既海灘騎馬。
最後去多一兩個景點，睇下黑沙海岸同東岸鯨窟既景緻。
同涯邊既風景影張相，就完成牛島行程。
上番巴士坐番十分鐘，回到碼頭登船回濟州島。
回到濟州島先醫肚，開車去京美家경미네집食下海鮮拉麵、鮑魚與海膽拌飯。
京美家都係家庭小店型式經營。
餐牌一張過睇曬。
京美家出名既鮑魚粥係必點。以前係釜山食過但感覺冇咩鮑魚味，今次呢個就真係食到有鮑魚鮮味。
昆布湯清清地但帶鹹鮮。
昆布海鮮泡麵都係好野，湯汁啖啖都係昆布鮮味，麵條又掛到湯，成煲麵食到見底。
雜菜鮑魚拌飯比起湯麵係較淡口味，但口味清爽幾岩夏天食。
濃味既芝麻海膽昆布飯都值得食，新鮮海膽加濃香芝麻同脆香紫菜又係一絕。

食飽飽就行下旁邊既UNESCO世界自然遺產既城山日出峰見識下。
城山日出峰於2007年被正式登記為世界自然遺產。
城山日出峰觀賞日出原來係濟州十大美景之最。
其實可以觀賞完日落先閃，但大家都冇帶厚衫怕太凍，所以都冇上山頂，只係欣賞一下四周景色而已。
山腳下有手信店可以睇下買下。

晚餐去左主打鮑魚出品既明珍鮑魚명진전복。
鮑魚刺身同鐵板烤鮑魚應該係必點。
鮑魚刺身非常爽口但要點醬汁先食到鮮味。
鐵板鮑魚幾有咬口，鮑魚味比刺身突出。
另外都要試下鮑魚粥，色水幾深但不算太有鮑魚味。
鮑魚石鍋拌飯都可以，因為飯粒同鮑魚內臟一同炒香。
重有條韓式一夜干，魚肉有點實但魚味都濃。

回濟州市途中，順路經過麵包店Audrant Bakery就落車睇下。
麵包睇落都幾吸引款色又多，就買定幾包聽日當早餐。

今晚係最後一晚係濟州，大家都想試多d美食，頭先晚餐都比較早食完，所以就8點半前剛趕到濟州市內既三姓穴海鮮鍋，食下人氣海鮮鍋。

個海鮮鍋都真係好澎湃。隻蟹都好巨型，重有鮑魚海螺八爪魚，不過海鮮下面都墊左一大堆芽菜，如果唔食芽菜既人可能會有少少抗拒。
海鮮鍋內既海鮮全部都係岩岩活捉放上去，所以上左檯都要等十幾二十分鐘煮熟先食。
鮑魚都識郁下郁下食落都新鮮。不過八爪魚更鮮甜彈牙，最後當然要飲埋吸收曬日月精華既湯汁先收工。

完成海鮮鍋真係要俾個肚休息下，去左行Lotte以外既大型超市E-Mart이마트 신제주점。呢間E-Mart有兩層parking，揸車過黎shopping fit曬。
係時候認真買下濟州出品當手信。

離開E-Mart經過市中心，咁岩有間Olive Young未收，即刻泊低架車係街邊，俾女團友快手入去掃下貨。

今日既最後一餐去左三代麵條會館既老店試下韓式水餃同豬肉湯麵。
呢度收得比較夜，所以呢餐預左係當宵夜。
舖內非常光猛又有長檯，如果人多想食宵夜可以考慮。
白切五花腩偏肥，連埋生菜泡菜一齊食就冇咁油膩。
餃子包得脹卜卜，菜肉比例又平均係今晚既亮點。
湯麵既湯汁非常黃，飲落就知除左色之外，味道都係非常濃郁既豬肉湯。
麵身幾有咬口，加左大堆紫菜後碗湯多左豬肉高湯以外既紫菜味平衡下。
食完宵夜總算完成全日豐富到爆既行程，番去民宿途中仍在回味牛島既陽光與海灘。

濟州金萬福鮑魚飯捲濟州本店
제주특별자치도 제주시 오라로 41064-759-8582

濟州海鮮飯卷
24 Mugeunseong 7-gil, 삼도2동 Jeju-si
064 900 2527

牛島炸醬麵 우도짜장맨
제주 제주시 우도면 우도해안길 1132
507 1411 0465

牛島王子的故事 우도왕자이야기
제주 제주시 우도면 우도해안길 1122 1층

京美家경미네집
제주도 서귀포시 성산읍 일출로259
064-782-2671

城山日出峰西歸浦市城山邑日出路284-12
064-710-7923

明珍鮑魚명진전복
제주 제주시 구좌읍 해맞이해안로 1282
064-782-9944

Audrant Bakery
552-3 Johamhaean-ro, Jocheon-eup, Jeju-si
064-784-5404

三姓穴海鮮鍋삼성혈해물탕
20 Seondeong-ro 5-gil, Yeon-dong, Cheju
064-745-3000

E-Mart이마트 신제주점
제주 제주시 1100로 3348 이마트
064-798-1234
三代麵條會館總店
제주특별자치도 제주시 일도이동 1045-12
064-759-6644

韓國濟州島首爾自駕自由行 Day1

韓國濟州島首爾自駕自由行 Day2


韓國濟州島首爾自駕自由行 Day3