繽紛街點心 : 慈悲香港食堂 精選

 
自從有左廟街夜繽紛，廟街夜晚係旺左一排，可惜只係曇花一現，對比初期既人流，現在似乎退去不少。某日再經過廟街，越過一排夜繽紛鐵皮檔後，見到幾個綠色大字以為係教會之類的地方，行近再睇先知係餐廳。此店原來係廟街神父胡頌恆2023年開既慈悲香港食堂點心餐廳。
出品同其他點心店冇咩分別，大路想食既點心基本都齊。
另外重有包點甜品及蒸飯。
蒸飯有套餐可選，星期一至五重有下午茶套餐。
隨心點左幾款點心，慢慢飲住茶等點心上檯。
轉頭熱到噴煙既鮮蝦菠菜餃先上，餃皮煙韌有彈性，蝦肉及菠菜都是新鮮貨色。
韭菜煎餃夠份量，餃皮香脆餡料豐富。
肉同韭菜比例平均。
三色燒賣都足料，豬肉塞到滿瀉，當中既麻辣燒賣最惹味。
魚肚雞扎真材實料，雞肉實在魚肚爽滑。
川味金錢肚都可以，金錢肚夠多又夠淋，但川味如辣度強一點就更有特色。
點心雖算大路貨色但選擇唔少，而且做得好又有水準，下次行過有時間有胃口都會想幫襯。

慈悲香港食堂
佐敦廟街191號地舖
TEL : 66047877