枝竹甘庶羊腩煲

cici小廚房 於 17/02/2014 發表 收藏文章
琴日天氣乍暖還寒, 感覺上都係寒冷, 可能陰天的關係. 不過, 過兩日又會再凍番. 係這段期間, 大家要注意身體. 因為我身邊有幾個朋友都病倒了!

見琴日仲有少少凍凍地, 就心思思想食羊腩煲. 因為太耐冇食過. 食完羊個身又會暖笠笠. 我仲一邊食, 一邊用羊腩汁嚟打邊邊, 真係好爽架~~~

枝竹甘庶羊腩煲 (3-4人份量)


材料:

羊腩 1斤半
冬菇 8隻
炸枝竹 3兩
馬蹄 半斤
薑片 4片
蒜頭 4粒
乾葱頭 3粒
陳皮 1小塊
甘庶 6兩
檸檬葉 3塊
香芹 1棵
蔥段 2棵
米酒 1湯匙
生菜 2棵

調味料:

柱侯醬 2湯匙
南乳 1磚
磨豉醬 2湯匙
腐乳 1磚

做法:

1. 羊腩切件, 洗淨放在已盛凍水的鍋中, 用慢火煮開至全熟. 讓羊肉出血水去羶味, 撈起用凍水沖淨備用.
2. 冬菇浸軟, 切去蒂留用, 切厚片, 浸菇水留用.
3. 陳皮浸軟, 用小刀刮去瓤備用.
4. 馬蹄去皮洗淨, 切半備用.
5. 薑切片, 乾葱頭; 蒜頭去皮切半拍扁, 蔥; 香芹切段, 檸檬葉洗淨備用.
6. 甘庶去皮, 切成長粗片備用.
7. 燒紅鍋, 下油爆香薑片, 乾蔥, 蒜頭, 蔥頭, 爆出香味, 放羊腩兜炒, 灒酒. 當酒精蒸發只剩香氣, 下馬蹄和甘庶炒勻.
8. 下南乳, 腐乳, 柱侯醬爆香, 加水和浸菇水浸過所有材料, 下陳皮及檸檬葉, 蓋上煲蓋大火滾起, 小火煮30分鐘, 熄火焗15分鐘.
9. 再滾起, 下冬菇後滾起, 小火煮15分鐘後, 熄火焗15分鐘
10. 再滾起, 下枝竹後滾起, 小火煮15分鐘後, 熄火焗15分鐘, 臨上檯, 加入香芹及剩餘蔥段即成.

**溫馨小貼士**

1. 炆肉類要腍而不散, 重要步驟是炆一會, 熄火焗一會, 一味死炆只會肉太硬或太腍.
2. 羊肉愈新鮮愈少羶味, 或選一些脂肪比例較少都會少羶味.
3. 甘庶能辟除羶味, 亦有一定甜度, 故無需再落糖.
4. 檸檬葉能提升羊腩香味, 亦都有辟除羶味功效.
5. 用爐熱着, 可當作火鍋, 一邊食羊腩, 一邊灼菜或其他材料吃更佳.


打邊邊:






這裡來LIKE吓我的Facebook Page支持呀~

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→