冬天大滋潤-椰子紅蘿蔔雪耳鮮百合湯 精選

從星期日開始, 天氣開始凍, 睇天氣預測, 應該會凍足一星期. 我終於覺得似番個冬天啦! 雖然我都幾怕凍, 都唔明冬天出世嘅我, 冇理由會咁怕凍架! 冬天當然要飲多D滋潤湯水, 就由我嘅湯水滋潤你哋啦!

椰子紅蘿蔔雪耳鮮百合湯

材料:

新鲜椰子 1個
椰子水 1包
紅蘿蔔 1絛
雪耳 3錢鮮百合 2個
豬冧肉 大約$20
蜜棗 2粒
薑 3片

做法:

1. 椰子洗淨後切片, 紅蘿蔔刨皮洗淨後滾筒式切件, 備用.

2. 雪耳浸透, 用剪刀剪去硬蒂, 撕成小朵後備用.

3. 豬冧肉洗淨, 汆水後備用.

4. 蜜棗浸洗後備用.

5. 鮮百合切去頭尾啡黑色部份, 逐塊剝開洗淨.
6. 凍水放薑, 滾起後, 放入所有材料 (除雪耳鮮百合外), 先用猛火煲半小時, 轉慢火煲半小時, 之後加雪耳及椰子水再煲一小時, 轉猛火至大滾後, 放入鮮百合滾10分鐘, 下鹽調味, 即成.

[溫馨提示]:

1. 豬冧肉即大腿近豬柳位的瘦肉, 比一般瘦肉腍滑一點, 用作煲滋潤湯水比瘦肉更加適合. 緊記煲湯前要先出水, 去除血水和油膩, 煲出來的湯會很清.
2. 煲湯一定要先用猛火煲最少30分鐘, 然後轉慢火, 煲好後才下鹽調味.
3. 新鲜椰子在山草藥檔便可買到, 檔販會幫你砍開, 倒出椰子水包起後, 再砍大塊. 買回來之後洗淨再切小片, 煲湯才能出味.

●功效:
椰子性味甘、平，入胃、脾、大腸經；果肉具有補虛強壯，益氣祛風，消疳殺蟲的功效，久食能令人面部潤澤，益人氣力及耐受飢餓. 椰子水具有滋補、清暑解渴的功效解渴去暑. 雪耳滋陰潤肺, 有平民燕窩之稱. 紅蘿蔔清腸胃; 鮮百合潤肺止咳, 清心安神, 養陰益氣.


按這裡來LIKE吓我的Facebook Page支持呀~