有一日行過喺西菁街附近同媽子大人食野，見依間"傳點心意"點心舖岩岩新開冇幾耐，媽子就話我地今晚晚餐黎依度試下囉？我話好呀！叫埋西裝友一齊黎試下(因為西裝友最最最鐘意就係食點心)！所以一有啲咩新開既點心舖我地都有去試！
我地叫左蝦豬頸肉蒸飯、蝦餃燒賣、蒜味蝦春卷、木魚花蘿蔔絲腸粉、紫菜百花卷、懷舊馬拉糕、啜啜包、冬陰公鮮竹卷、棉花白兔仔......
個蒸飯根本就貌合神離，飯底濕左啲，雖然啲米係粒粒分明，雖然佢用嘅豬頸肉係新鮮貨唔係雪藏，但飯同豬頸肉係分開整熟嘅，然後合併埋一齊蒸多陣扮蒸飯，點解我會咁講呢係因為如果餸同飯係一齊整熟嘅話，整蒸米嘅過程嗰啲米粒會膨脹會黐實啲餸好似啲餸係會好似凹陷左落啲飯面度，坊間宜家都好少係真正既蒸飯！
至於蝦餃燒賣，水準係屬於中上入面既蝦好彈牙，啲蝦又多，蝦餃皮都做到晶瑩剔透，厚薄適中，但係口感呢就略為削身左少少！燒賣呢就入面睇到有原粒嘅瘦肉，又唔會太肥膩，肥肉同瘦肉嘅比例拿捏得好好！
個蒜味蝦春卷，就因為蒜頭味太過重，蒜頭味蓋過咗蝦既鮮味所以一啲都食唔到蝦味，完全係失望，因為食落一啲都唔似食緊蝦春卷次食緊一條蒜蓉味嘅春卷，仲有個百花紫菜卷先係最激氣嘅地方，好大原因我係依味點心吸引入黎食傢，因為呢佢嗰啲百花膠呢完全係唔彈牙唔爽口仲淋滋滋，佢只要用多少少心機搞到佢兩野至起膠就會爽口好多啦，同埋呢啲白花膠呢一定要落少少肥肉，咁炸嗰陣時先唔會太乾會好食好多！仲有最敗筆嘅地方係佢竟然用炸漿，其實只要用腐竹皮捲着攞去炸或者煎已經好好味！
仲有個懷舊馬拉糕，落嗰啲發粉同埋泡打粉落得太多食落去有苦味，個發酵時間拿捏得唔好，令到嚿糕發成兩層唔同質地，佢個馬拉糕只係做到個顏色係懷舊馬拉糕既顏色，令到我媽子失望！
成餐最有驚喜就係嗰個木魚花蘿蔔絲腸粉，裏面個蘿蔔炸脆口，但外面既腸粉皮就厚左少少，但係如果佢唔厚少少嘅話呢就應該好難夾得起同埋保護唔到佢中間既炸蘿蔔絲，店員會提醒你豉油唔好直接淋落中間係碟邊落就可以架啦，唔係啲蘿蔔絲會好快淋曬，個腸粉豉油都教得唔錯，鹹甜岩岩好！
啜啜包呢，其實就係一個放大版小籠包！
個冬陰公鮮竹卷就係伏中之伏，簡直係怪味都唔識點形容，求其一啲香料煲出嚟就話係冬陰公，佢只不過係用佢所為嗰啲冬陰功湯浸住啲鮮竹卷，再放兩個蝦頭想去裝飾(呢個點心係西裝友話想試吓，我已經提醒左佢一定會中伏！)
至於果隻可愛嘅兔兔呢！我就覺得真係覺得好食過出面嗰啲大酒樓！蛋白打得十分鬆軟岩岩好，大細岩岩好，入口即溶！店員好細心係你食曬所有鹹點之後先會上檯！
更多精采內客請㩒：http://www.eatwmacy.com/
請按此登錄後留言。未成為會員? 立即註冊