【禍從口出】5句職場犯眾憎的說話

正所謂野可以亂食，說話唔可以亂講！雖然話性格爽朗的人總係比較nice、比較容易相處，有嗰句講嗰句，但有時太直接、太口沒遮攔，就會變左做口不擇言，有可能激嬲左人地自己都唔知！而有啲說話更加係辦公室禁忌，講左分分鐘得罪人多，成為「職場犯眾憎」，甚至會影響你的職場生涯，所以緊記要慎言！
1. 「呢樣我唔識做架喎 ! 」
首先，公司請得你番嚟，當然係因為覺得你有實力、你幫得手。而家你一句「我唔識 」就想將啲工作推番比上頭或者其他同事，只會顯得你冇上進心，又唔肯學習新事物。冇人一入公司就識做曬所有工作，但只要你肯比心機去學，亦會諗方法將工作做到最好，就算最後的成果唔係咁理想，大家都會知道你曾經努力過。

2. 「你咁叻你嚟做啊 ! 」
辦公室講求凹凸互補，每個人都各有優、缺點，如果係因為自己的不足，導致在工作上出錯，咁就實在不應該講啲咁嘅悔氣說話。自己的工作沒做好，聆聽有經驗的前輩的意見是十分重要的，別人的叮囑要緊記，然後將佢化為動力再將錯漏改正，自己做出成果先有成功感架嘛！
3. 「唔關我事架 ! 一早講左唔好咁做啦 ! 」
責任感在職場上都是非常重要的一項基本要素。如果公司有啲咩事，個個都事後諸葛亮咁話「唔關我事」、「話左你啦」，咁事情應該由邊個人去解決呢？其實有冇責任都好，身為公司的一份子，有咩事起上嚟都唔應該第一時間置身事外，有咩幫到手的就盡量去幫，大家團結一致先能夠解決困難架嘛！

4. 「佢地同我都唔啱key！」
一間公司能夠邁向成功，講求的因素莫過於係公司上上下下互相合作。每個人的性格和處事方法都唔同，而在職場上少不免要做好多跨部門的大project，所以公司請人時都好着重員工的合作溝通能力。員工在與各部門協調時，主動向對方提出自己的見解和建議，好多工作自然就會事半功倍！但你一句「我地都夾唔嚟！」就要人地同你執手尾，只會顯得你的合作溝通能力低！
5. 「都唔夠時間做！係咁上下喇！」
無論係番工定番學，好多時候都需要你在短時間內完成工作，呢個時候唔應該向人地抱怨唔夠時間做，你應該做的係把握時間，分配好咩時間做咩工作，並為自己定下目標。好多時候，你上司都唔係特登在咁有限的時間將工作交比你，可能係客戶或者緊急文件的因素先會令到大家拿手唔成勢，不過呢個都係一個考驗你工作效率和辦事能力的小測試啊！

說話可以反映出一個人的性格和處事態度，特別係對於第一次見面的人，你講啲咩就代表你係一個點樣的人。唔想人地覺得你求求其其、做野冇嚟交代？咁以後講野就要諗過度過喇！