關於大學的簡稱

大學校園裡，一對父子坐在長椅上，討論着各間大學的名字。
「爸爸，點解城市大學簡稱叫城大，用第一個字；但香港大學叫港大，用第二個字？」爸爸遲疑了一會，一時之間想不到答案，於是便試着按字面去念一次。

「我諗係好聽啲掛，如果叫市大，好似講間大學好屎咁；香大呢，就唔吉利囉！」他回答兒子，兒子聽後摸着頭髮，一副「師父明白了」的模樣。

「咁點解樹仁大學叫樹仁，教育大學啲人都仲係叫佢教院啊？」原來兒子還未放棄這話題，將之延伸到其他大學。

爸爸循着相同的思考模式，「如果樹仁叫樹大，咪會驚招風？至於教育大學叫教大嘅話，咁可能有人會問咁有冇較細。」
兒子似乎不太同意爸爸的解說，但他又不堅持追問，卻是再提出另一些大學的簡稱。

「浸會大學都幾得意，啲人鍾意浸大，冇人叫會大。」兒子喃喃自語的，爸爸在看着他，已經想不到對應的方法，就任由兒子發揮小宇宙吧。

兒子看到爸爸沒有接下去，自己仍然堅持，「嶺南大學就叫嶺大，如果叫南大就會當家啦，哈哈哈！」可能有其父必有其子，想不到兒子的思維也偏向了爛GAG一方。

爸爸輕輕拍着兒子的頭，這個可愛的兒子才十一二歲，卻對香港每間大學的名字及歷史興趣極深。有的小孩喜歡巴士，有的小孩喜歡打機，有的小孩喜歡從小談戀愛，而這個小孩卻古怪的喜歡大學的種種。
想必他一定在選心儀的大學了吧？兩父子身處的大學校園，是香港大學周亦卿樓對出的空地，那兒有着一尊代表六四的雕塑，就倚立在餐廳對開位置，不少內地交流團也會來到，在這個他們被隱藏的雕塑前，胡亂地拍照留影。

爸爸當然渴望兒子能夠進入港大，是香港第一的大學，哪個父母不想。然後，他試着詢問兒子：「如果要入港大，兒家就要好俾心機讀書架喇，你有冇信心先？」兒子呆滯了一會，突然又再說大學的簡稱來，無視父親的提問。

「仲有理工大學、中文大學同科技大學啊！啲人好少叫理大，通常叫POLY，佢全名叫Polytechnic，但十個九個都唔會讀出嚟，香港人真係好懶！」兒子一副專家的模樣，但父親卻仍舊希望兒子的志願是否要考入港大。

「係喎，中大有個專屬火車站叫大學站添，都幾威架！」父親才想起中文大學亦不錯，若兒子入不了港大，能夠入讀中大也好，而且還更接近住家。
「港大夠有個站啦，之前都爭取過叫大學站，後尾好似唔成功。」兒子又一臉正經的討論着大學車站的事，又談起港大，令爸爸心大心細。

「其實科大都好，唔會叫技大咁難聽。」兒子還是回到大學簡稱的話題。

然後他走進餐廳去，坐下來，用自助點餐機點了一份下午茶。爸爸也跟着進去，沒有點餐，只是坐下來，幻想兒子未來在港大畢業時，穿着畢業袍拍照的畫面。

不過，到兒子長大到適齡進大學之時，可能港大變了香大，城大變了市大，科大變了技大，樹大亦可招風，南大真的當家了，然後教大不會教細，浸大還是浸大，理大已沒有人念POLY，中大還是否能保留在大學站裡，也不能百分百確定。
兩父子同處大學校園裡，爸爸刻意帶兒子到港大感受最高學府的氛圍，兒子就淡定地討論着大學簡稱的事。爸爸想得入神之時，兒子卻在喝着凍檸茶，咬一口雞翼，畫面就如各間大學之間的競爭那樣，既無形，又有形。

註：圖片取自互聯網