辣辣雞煲邊個食？我要食！你要食！ 精選 推薦

終於！天氣開始凍啦！Yeah！一有涼意就開始想約埋一大班朋友烚吓烚吓，而且仲要係超惹味、辣到出汗嘅麻辣雞煲！食完隻雞再落響鈴落墨丸落肥牛，離開餐廳時成身暖笠笠，大‧滿‧足咪就係咁解！

一品雞煲火鍋 / 荃灣
餐廳資料： http://bit.ly/1LdjftM
雖然呢間餐廳於旺角、紅磡、土瓜灣都有分店，不過識食一定係去返荃灣食！唔少食家都話呢家雞煲好食到冇其他店可以比較，難怪Book又難Book仲時時大排長龍！呢家店食落又香又辣，唔會死鹹但又夠濃味，最重要係質素穩定！食完滑滑雞肉後記得叫爽口墨魚滑同公仔麵，吸哂味埋個靚尾！
相片由會員提供：尖東為食公關

隨變燒烤麻辣雞煲 / 佐敦
餐廳資料： http://bit.ly/1WQj6bR
由街角細舖做起，直到而家有3間分店(油麻地同灣仔都有)，由於食材普遍都係比坊間其他任食店高，所以佐敦老店依然係晚晚座無虛席！同埋食煲之前記得點返一兩道前菜好似流心嘅尖椒皮蛋、麻辣金錢肚咁，最後叫份招牌隨變粉埋個靚尾！
相片由會員提供：Yummieeeeee

米走雞 / 長沙灣
餐廳資料：http://bit.ly/1OI3iU8
佢嘅邪惡芝士雞煲應該好多食家都有耳聞吧？雞煲上臺時上面有多多芝士碎，睇住佢慢慢同雞件糾纏在一起，未食都流哂口水！而且佢哋嘅芝士湯底係香濃而不膩果種，店員又會定時為大家加芝士汁，唔會愈食愈淡口！食雞之外，大家記得試埋新鮮牛頸脊同手打粟米鮮牛丸，仲未覺飽嘅話咪叫多份響鈴同公仔麵囉，埋個靚尾嘛！
相片由會員提供：Mr.W

至尊重慶雞煲 / 旺角
餐廳資料： http://bit.ly/1Prg0GU
人多兼胃容量大緊係選擇雞煲放題啦！呢家店除咗旺角，於元朗、銅鑼灣都有分店。平均每個人百零蚊落到樓，有五十幾款配料任點任食，仲要啤酒、汽水任飲！溫提：無論你選擇叫重慶雞煲抑或胡椒豬肚雞煲，記得叫花膠索埋啲汁埋個靚尾！
相片由會員提供：Yannn.

陸陸雞煲火鍋 / 旺角
餐廳資料： http://bit.ly/1SonHeK
呢間店於旺角有兩間分店，裝修比較新潮，食家鐘意佢水準夠穩定同埋邊爐料有特色！好似清湯牛腩、手打蝦丸、鹹牛肉芝士釀油炸鬼咁掉落去淥一淥就食得，入口香脆，極邪惡！最後唔好唔記得叫樽青檸梳打開開胃、消消「滯」！
相片由會員提供：Yan_PIG

前家樂餐廳火鍋店 / 大角咀
餐廳資料： http://bit.ly/1MrDohz
一般麻辣雞煲已經滿足唔到你？咁你可以考慮去大角咀呢間餐廳試試醉雞煲/香辣雞蟹煲！前者湯底陣陣酒香。適合食唔到辣嘅朋友，如果你自問食得辣，可以挑戰惹味嘅後者，蟹鮮兼有蟹膏，而且煲內仲有唔少隻大硯！另外再叫咩火鍋料埋個靚尾好？當然係呢度招牌芝士竹輪啦！
相片由會員提供：Eric_yau

更多雞煲餐廳資料：http://bit.ly/1NCf9zI
唔食得辣但都要烚：http://bit.ly/1SNd85E