我的父親母親

有乜講乜 於 26/08/2022 發表 收藏文章
我的父親母親
 
「我哋已經揾律師搞好咗,封信放咗喺房入面個柜頂……呢間屋……………………」我從來無諗過呢個情境真實出現嘅時候,我會點樣。喺呢一刹那,我覺得媽媽真係老嘞。連佢自己都覺得有啲嘢要早啲安排會好一啲。定咗落嚟,個個都會安樂啲,安心啲,安份啲,和諧啲……
 
無論仔仔女女長大到幾多歲,做父母嘅都希望盡佢哋一切為佢哋做一切,著想一切 ; 一餐飯,一煲湯,一碗麵,一隻煎蛋,一磚腐乳,一通電話,一次抹面,一碗盒仔茶,一次換衫,一次又一次嘅走走糴糴……呢啲係唔係就係「養兒一百歲,長憂九十九」?咁做人兒女嘅,又有幾多個做到「當兒每一歲,奉親和颜悦」呢?
 
對自己無微不至嘅父母,你又做過啲乜嘢呢?返屋企食飯?請佢哋飲茶?同佢哋去旅行?買禮物俾佢哋?仲有無?買層樓俾佢?仲有無?同佢擺大壽,慶祝生日?仲有無……但比起你曾經令父母唔開心嘅,呢啲又算得係乜嘢吖。
 
每個人都有做過父母嘅心頭肉,亦都有做過父母嘅頂心杉。講咗啲哽喺心入便嘅說話。不過唔緊要,2011年4月17日,有個人教識咗我哋點樣做去彌補呢啲嘅遺憾。簡單,直接。
 
佢就係第30屆香港電影金像獎,最佳男主角。佢喺台上講咗一番說話,佢老豆喺電視機前睇到佢講咗呢番說話。
 
 


十多年後,佢老豆喺第40屆香港電影金像獎都真正成為最佳男主角,實至名歸。

 
唔係人人都咁好彩喺未錯過咗嘅時候,有機會去彌補呢啲遺憾。如果嗰個係你,你會點做?
 
多謝你,第30屆香港金像獎最佳男主角。更加要多謝嘅係第30屆香港金像獎評委,無你哋嘅決定,就無呢一幕嘅經典。香港電影,繼續努力。

對不起,多謝你,我的父親母親。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→