愛是.............? 5 精選

仲係讀緊書果陣,你係一個都幾內向既人
或者咁講,你雖然唔算好鍾意社交,但你唔會抗拒社交
只係,你會將「同學」、「朋友」、同「知己」等..分得清清楚楚
因為你覺得如果要係唔同時間,都要迫自己走去approach唔同既人,
你會慢慢分唔清到底邊個先係真心知己,邊個只係純粹一個生命上既過客

「同學」就唔洗講,平時真係唔會同佢地有幾多句,
最多係有時group project果陣,同佢地有交流, 而且你自己都尚算主動,不過一定只限於學術上既野,其他一律唔講
佢地問你:
「喂,搞掂一齊食lunch?」
你會咁答:
「唔啦,我約左人」但你其實係冇約
又或者佢地問你:
「不如一路lunch一路傾?」
你又會咁答
「其實唔洗份project又唔洗咁趕,不過如果你地真係唔得閒既,我唔介意幫你地做多些少」
之後又係自己一個lunch

「朋友」就比同學較為親切,你地會傾既話題都比較多 例子有你班上面既阿強,呢個表面上係個世界仔,好識講說話,面面俱圓,好有人緣
但實際上,你係機緣巧合下知道左佢係一個會透過wechat,網上chatroom識女既食家黎,
你地識英雄重英雄,有時仲會分享下戰報,或者賽後檢討添
仲有個係阿俊,好普通既名,個樣有少少毒,佢間唔中會同你一齊落機鋪打拳皇,
你係一次打緊機果陣見到佢,所以先同呢位同班同學混熟
你唔介意同佢地一齊食飯,因為你地之間應該係有相共同興趣或者共同話題
你都幾享受同佢地一齊既時間,
只不過當你遇到問題既時候,你未必會同佢地分享
就算佢地問起:
「喂,呢排見你好似好頹咁,有野唔開心?」 你都只會咁應:
「係?我自己又唔覺喎哈哈,可能呢排功課幾忙咁啦」

「知己」自然係比朋友再親切d
其實佢地係你隔離班既同學,
不過低form果陣一齊玩開,而家升上高form,
因為讀既科唔同,結果你地分別去左唔同班
你同朋友之間會做既野,你同你d知己一樣會做
唔同既係,有心事果陣,你會選擇向呢班知己講,
又或者衰少少咁講,如果要你將自己社交網絡入面既人劃分做唔同等級,
佢地應該算係你個社交圈子入面最高級果批黎

但唔知幾時開始,似乎你班同學sense到你個「社交階級觀」 見你待人十分之冷漠,開始覺得你份人幾鍾意擺架子
有d甚至乎開始對你反感

朋友方面,你班朋友,佢地就真係只會停留係朋友階段
同你講既野,慢慢只會圍繞住你地之間固有既共同興趣同話題
例如阿強,只會同你交流食女心得,唔會再過問你其他事
阿俊就只會同你分享最近機鋪多左d乜玩拳玩既過江龍咁

正當你好慶幸你班知己仲對你不離不棄果陣,
你發現
正當你好慶幸你班知己仲對你不離不棄果陣,
你發現其實自己咁諗係好天真,
你感覺到佢地對你冇以前咁熱情 係咩原因?
唔係佢地開始討厭你,只係...
你發現佢地對待其他人,似乎並冇果一種「社交階級觀」