【戲鬼谷】六個入場睇《冰天血地8惡人》(The Hateful 8)的理由

4media life 於 18/02/2016 發表 收藏文章
係睇更多精彩內容之前,不妨follow我們專欄的fanspage呀!
「4 media life」Facebook page
============================================================================
今日塔倫天奴嘅新戲《冰天血地8惡人》正式喺香港上映。筆者十分期待呢部電影,因為題材正是塔倫天奴嘅拿手好戲,亦係最令筆者著迷嘅片種——西部片。假如不幸地,你受到垃圾賀歲片嘅洗禮,荷包受重創,仲十五十六緊睇唔睇呢套戲嘅話,我俾你六個一定一定要入場睇《冰天血地8惡人》嘅理由。

1.亦正亦邪,各懷鬼胎
冰天雪地,7男1女,一間小屋……大家冷靜啲,呢套唔係小電影。

睇戲最討厭就係導演編劇強行將佢嘅價值觀套落觀眾身上,觀眾唔係低能的,大人大姐唔使人話你聽邊個係忠邊個係奸。然而,喺西部片歷史中,亦正亦邪呢個概念比較創新。好多老一輩影迷不太喜歡早期美國西部片,主要原因都係覺得電影題材老調重彈——正直的牛仔追捕十惡不赦的惡棍,正氣凜然的將軍剿滅印第安人…...其中以尊榮電影為表表者。拍呢類電影不外乎兩個原因:同國民進行公民教育,以及培養國民歸屬感。隨著時代變遷,冷戰氣氛瀰漫社會,傳統說教式西部片開始流失觀眾,反西部片(Revisionist Western)興起。美國反西部片在50年代開始嶄露頭角,電影令觀眾開始思考,其實壞人又唔係咁壞,好人亦不見得好好。60-70年代意大利式西部片橫掃全球,呢種亦正亦邪嘅風氣開始影響其他片種。大家到宜家仍然講緊嘅西部片,好多都係屬於呢類。
1969年《流寇誌》在香港上映時嘅介紹

講左咁耐故仔,只係想同大家講,大部分塔倫天奴電影都有經典西部片影子,糅合各家所長。年輕一輩比較少接觸呢一類電影,但以塔倫天奴對電影嘅觸覺,要復興西部片可謂易如反掌。1992年塔倫天奴第一套電影已經為觀眾提供一陣強烈的「戲」味,未完場你都唔知故事發展如何,吸引你眼球,引導你跟住故事線走,你唔需要顧及道德問題,因為呢.套.係.電.影! 唔係教育電視。大家入場前不妨先做下功課,觀影時自然更投入。
1992年 《落水狗》 誰是好人,誰是壞人?重要嗎?

2.立體角色,深層意義

一套成功嘅電影,角色非常重要。無論劇情如何,一個立體嘅角色可以救返一套爛片。塔倫天奴成功之處係,每一個角色都可以出一套外傳。例如《落水狗》中,食飯唔肯俾貼士,槍戰就柄埋嘅粉紅先生;《危險人物》中,身為黑社會殺手但又相信神靈存在嘅Jules Winnfield;《危險關係》中,去過搶銀行但連自己架車泊喺邊都唔記得既Louis;《標殺令》中,滿腦子詭計,但又要喺脫衣舞吧做睇場嘅Budd……

劇本角色多,好難會處理得好,一係偏重講某個角色,而忽略左其他可以輔助故事發展得更好嘅角色,而最差嘅,就係每個角色都處理得差,唔立體,將導演眼闊肚窄嘅缺點原形畢露。塔倫天奴卻可以令到出場只得幾分鐘既大配角,性格,喜好,談話都立體得好似主角一樣,觀眾都想知更多關於佢嘅事。

3. 血肉橫飛,大賣血漿

塔倫天奴嘅電影世界裡,對白、子彈、血漿無限供應。無論你係奧利華史東定係吳宇森嘅fans,你都一定會佩服塔倫天奴對暴力嘅處理,佩服香港電影對荷里活嘅影響。塔倫天奴曾經講過,吳宇森對暴力嘅處理徹底影響佢嘅導演風格。身為香港人,唔係唔撐呀?
1989年 《喋血雙雄》 為暴力美學立下里程碑

暴力美學一個好重要嘅原則係,暴力係一種美嘅表現,唔係以批判社會角度出發。觀眾唔會覺得難受,反而會津津樂道。

近期香港社會發生咁多不快事件,某全國人大仲話無論挺梁定倒梁都應該反對暴力,似乎唔明白暴力可以有諸般用途。等我地一齊投入塔倫天奴嘅世界,撇開社會為暴力設下嘅枷鎖。

4.70mm Ultra Panavision Road Show

呢套係事隔差不多50年後,第一套用70mm Ultra Panavision拍攝嘅電影,但好可惜,香港觀眾應該體驗唔到呢種菲林嘅威力,皆因大部分戲院都播唔到70mm電影。

70mm有咩咁巴閉?佢主要係大型製作使用,比常用嘅35mm菲林容納更多細節,色彩、景深等失真較少,影像更接近完美。70mm Ultra Panavision更係用電影史上最闊比例2.76: 1處理。拍攝時變形鏡頭將超闊畫面壓縮1.25倍,因此播放時亦需要用同樣鏡頭橫向放大1.25倍得出超闊嘅2.76: 1比例。呢類鏡頭已經塵封多年,70mm Ultra Panavision鏡頭組全世界只有一個。Panavision只會借俾有名氣、有實力嘅導演同攝影師,塔倫天奴同Bob Richardson就係幸運兒。

用菲林製作電影,塔倫天奴亦順勢幫柯達公司一把。近年電影數碼化,好多電影只會用菲林拍攝部分鏡頭,甚至全部都用數碼處理。以單部電影而言,塔倫天奴可謂近年柯達最大顧客,全套電影一共用左6000米菲林。柯達都明白塔倫天奴拍戲鍾意超長take,所以提供俾塔倫天奴嘅Vision3 5219菲林亦由平時嘅1000尺一卷,延長至1800尺一卷。
講咁耐,點解要用超闊銀幕處理呢套電影?呢部戲嘅場景主要由戶外雪景同小木屋內部組成。用超闊銀幕拍攝自然景色可以令畫面顯得更宏偉,氣勢逼人,觀眾好似親歷其境一樣。處理木屋內畫面可以令觀眾一眼睇曬屋內擺設,觀眾更能體驗到四面牆困住八個面目猙獰、各懷鬼胎嘅惡人喺狹窄小屋內面嗰種張力。

5.Ennio Morricone為電影畫龍點睛
喺呢部電影之前,Ennio Morricone曾經話過,以後都唔想塔倫天奴合作,因為覺得塔倫天奴將佢啲音樂亂咁用,前後毫無一致性同埋凝聚力。今次呢位奧斯卡終身成就獎得主破戒為塔倫天奴電影配樂,可謂非常難得。

Ennio Morricone可謂影史上最有才華嘅電影音樂作曲家,最初為沙治奧李安尼既意大利式西部片配樂而打出名堂,衝出意大利,佢嘅音樂亦成為意大利式西部片嘅代名詞。呢位音樂天才曾經為西部片、動作片、藝術片、懸疑片、愛情片、歷史片等等等等配樂,基本上你講得出嘅片種佢都有參與過。

塔倫天奴曾經挪用過Ennio Morricone嘅音樂做『希魔撞正殺人狂』主題音樂。

6.因為呢部戲係塔倫天奴拍,所以你要睇。講完!


============================================================================
想了解更多精彩內容,記得follow我們專欄啦!
「4 media life」Facebook page

留言


請按此登錄後留言。未成為會員? 立即註冊
    快捷鍵:←
    快捷鍵:→