最後回憶 : 富東閣海鮮酒家

 
早前在媒體見到富東閣即將完成歷史任務，沙田區食友已即時有反應，拍板過幾日就到來食多次，好留個最後回憶。
塞車關係遲左半個鐘先到沙田。
門口已人山人海。
今晚坐樓下，順手幫樓梯轉角位既錦鯉畫及對聯留影。
牆上既全包宴宣傳單張。
栗米湯羹比較杰，味道還好但口感一般。
遲到關係食友已開動，冰鎮咕嚕肉食到個冰盤都收埋，只剩眼前呢兩舊。
片皮鴨都放涼左。
好彩鴨肉唔太韌亦有點油香，只係個皮唔脆。
椒鹽鮮魷幾好，粉槳夠薄入口又唔會一口油。
栗米龍躉塊夠肉厚有咬口，只係栗米汁既栗米味較弱。
蒸鮑魚比想像中好，火喉剛好唔會太韌又有鮮味。
後加既特色小炒皇預左要等，好彩都係15分鐘左右就出現，上檯一刻夠熱又足料食得滿意。
以一間即將結業既餐廳黎講，出品水準比預期好，食客應可留個不錯既最後回憶。

富東閣海鮮酒家
沙田瀝源街6號瀝源廣場1樓5號舖
2699 8333