2024年2月台北快閃三日自由行 第三日 (合點壽司 大小姨海產店 門前隱味牛肉麵 永春市場 東加炸雞 小王煮瓜) 精選

三日快閃來到最後一日。
朝早天氣一般所以先留番係室內行下。
行到11點去試下合點壽司がってん寿司。
去到門口剛開始營業。
壽司都係用機點餐。
見到壽司師傅會在客人面前，一件件做手作壽司，就知道呢度同見唔到廚房既迴轉壽司會有分別。
出來既壽司模樣在型狀及大少比較都一致。
白子同蠔非常新鮮。
吞拿三食很好，中及大Toro都有油香。
大蝦肉爽脆都食得過。
另外壽司飯口感及醋味都可以，食得出同一般迴轉壽司唔同既感受。

吃罷壽司有點飽，但下午兩點已訂好門前隱味牛肉麵，就朝新北市進發在三重區行下先。
去到大同南路就走入街市。
感受下睇下在地街市有咩好東西。
負責睇檔既街市舖頭貓。
行過街市見到大小姨海產店，心血來潮就入左去叫兩味海鮮熱炒試下。
熱炒蚵仔好新鮮又飽滿。
入口一點蚵腥都沒有。
魷魚份量都唔少。
食落鮮甜肉質彈牙兼帶強勁九層塔香氣。
呢度既出品好夠份量，食完要飽住去食牛肉麵。立即係附近街市行多大半個鍾，預留胃納俾下站既牛肉麵。

三重空軍一村入口，門前隱味就在村內。
村內已變成景點遊客區。

一早已訂好門前隱味牛肉麵，牛肉麵係完全予約制，如果唔食麵既可以去食咖喱飯。
到店跟店員確認後，出店轉右行上一層平檯就見到用餐區。
等一陣就有店員送上兩客牛肉麵。
牛肉麵跟上滷豆乾酸菜及白飯冬粉。
粗幼麵各一碗，粗麵是寬條麵非常有咬口，幼麵其實也不幼身，不像廣東麵般纖幼但掛湯力很不錯。
厚切牛鍵紋理分明，肉質非常軟熟，入口即化無渣也有濃郁牛味。
湯頭睇落濃郁，飲落比想像更濃稠但不過鹹，多飲幾口感到淡淡的甘甜。
滷豆乾很入味又有豆香。酸菜最好係當食到有點飽滯時，來點酸菜可驅走滯脹感。
白飯冬粉這配菜辣度絕對不低，好辣之人應該很滿足。
飲埋湯飽到上心口。

完成牛肉麵後真係好飽，感覺連下午茶都食唔落，就係附近行下睇下舖頭貓貓。
重有偷走去曬太陽既蜥蜴。

過番河到台北市個邊，沿住忠孝東路向東行。
向住最大既黃昏市場永春市場方向行，去再次感受下本地人春節辦年貨既氣氛。
永春市場好旺但都有悠閒feel既貓貓。
入到市場都要睇下有咩好食，見到俾人群包圍既東加炸雞都忍唔住埋去迫埋一份。
餐牌非常簡單。
想食東加炸雞？有位就企埋去先，講乜都係假，最緊要拎到枝夾同吉盆先。
炸雞一出現要9秒9同人鬥快夾起雞件雞翼雞鎚雞丁等。
店家重會不定時出炸薯條同炸花枝丸等，呢d唔使搶因為大家眼中只有炸雞炸雞同炸雞。

夾到呢兩件雞令我好有成功感，自信都番曬黎。
炸雞既粉槳幾薄，唔係咬極都唔到肉個隻，雞皮冇咩皮下脂肪但雞肉好juciy兼帶香甜，而且店家一日只開店4個鐘，難怪大家要搶住買。

食完炸雞心滿意足，可以慢慢番旅舍拎行李，行去台北車站搭機埸捷運去機埸。
Check-in完過埋關就直奔第二航廈，因為個邊有米芝蓮推介既小王煮瓜，點都想食飽先上機。
香菇滷肉飯不錯，滷肉唔會太肥，肉同飯汁味道不過濃，用來送飯一流。
食飽上機就可以好好訓一覺。

合點壽司がってん寿司 京站店
大同區承德路一段1號京站時尚廣場3樓
02 2555 6638

大小姨海產店
新北市三重區大同南路151-1號
02 2972 7950

門前隱味牛肉麵 (完全予約制)
新北市三重區三重空軍一村正義南路86巷30號

永春市場
台北市信義區松山路294號
02 2769 5123

東加炸雞信義區虎林街108巷1號
886 920 015 023

小王煮瓜
桃園機場第二航廈美食區

2024年2月台北快閃三日自由行 第一日


2024年2月台北快閃三日自由行 第二日


2024年2月台北快閃三日自由行 第三日