【#酒知識】高海拔葡萄酒嘅迷思

唔知各位酒友有冇留意到,近年愈來愈多酒莊都標榜自家葡萄園、出品黎自 “High Altitude(高海拔)”,甚至同行之間會有一種 “你種得高咩?我要比你更高”嘅講法;今次就同大家了解一下,到底高海拔其實喺質素上係咪真係會好D?而同低海拔嘅酒喺風格上又會有幾唔同呢?咁下次去揀酒買酒嘅時候就更容易搵到心頭好啦 〜 😊


Q:高海拔對種植葡萄有乜影響?
A:理論上地勢愈高溫度相對會比較低(海拔高度每上升100米約降低0.6度)同時日夜溫差較為顯著,所以種出黎嘅葡萄就會含更高酸度及低糖份;而喺一D地勢非常高嘅葡萄園(如阿根廷安第斯山)會接觸到更高強度嘅陽光及紫外線,提子會長出較厚嘅皮。不過,‘針冇兩頭利’:高海拔嘅低溫有機會令葡萄唔能夠完全成熟、凍傷,而且部分高山地區更不利機器操作,有時候只能依靠人力。

Q:究竟要到幾高先算係高呢?
A:一般黎講喺歐洲葡萄園高過 500米 (1640尺) 會被認為比一般高,不過“高”嘅定義其實可以好主觀:好似之前喺瑞士有個酒莊自稱係歐洲最高(1150米),但係喺鄰國意大利就有葡萄園種植喺阿爾卑斯山區(1225米),再遠D喺西班牙更有葡萄種植喺高度1700米;至於喺南美洲則已經有唔少葡萄園種植喺1000米或以上,不過喺美國加州就有好多酒莊話自己係高海拔(平均低於700米),反觀智利、阿根廷及玻利維亞嘅葡萄種植海拔則高得多;而紀錄中最高嘅商業葡萄種植喺係阿根廷,海拔高度為3000米 (9850尺)。

Q:喺高海拔地區生產嘅葡萄酒有咩特別?
A:普遍而言,由高海拔地區生產、無論係紅酒定白酒喺風格上都會比較清爽乾身、酒體相對輕盈、酒精感會低一D,同時亦會有更細緻優雅嘅花香果香;至於較厚嘅提子皮就為葡萄酒提供更多單寧(Tannin)、顔色更深厚及擁有更好嘅陳年條件(Aging ability);而位於高山地區嘅土壤則含有豐富礦物質,更能提高成酒嘅複雜感。

Derekc:一個土生土長嘅80s香港人,過去的十年庸庸碌碌的工作、學習品酒到宜家於德國葡萄酒莊工作、鐘情於葡萄酒生活態度並希望將其推而廣之;有過一段外地生活體驗、一場意想不到的人生。如果大家喜歡小弟嘅文章請點按讚及分享到你的社交平台;另外如果大家有希望想睇到葡萄酒題目亦歡迎聯絡我,又或者可以傾下酒經 〜

Instagram : https://www.instagram.com/derekc_c/

Blogger : www.theworldwine.blogspot.hk

Facebook Page : www.facebook.com/Wine.Life.Style.HK
標籤: wine  wine tasting  wine news  葡萄酒  品酒  

留言


請按此登錄後留言。未成為會員? 立即註冊
    快捷鍵:←
    快捷鍵:→